ළිඳේ සිටි කිඹුලා අමාරුවෙන් ගොඩ ගත්තත් අරන් යන්න වනජීවියෙන් ඇවිත් නෑ

0
36

මැදවච්චිය, බෙල්ලන්කඩවල ගම්මානය හරහා ගමන් ගන්නා යෝධ ඇළේ සිට එළුවන් කෑමට නිවෙස වෙතට පැමිණි කිඹුලකු නිවෙස පහළ පිහිටි ළිඳට වැටී සිටි බවත් අනතුරුව දින දෙකක කාලයක් ළිඳේ ජලය ඉවත් කර එම කිඹුලා  නිරුපද්‍රිතව ගොඩට ගත් බවත්, එසේ ගොඩට ගත් කිඹුලා දින දෙකක කාලයක් ගත වන තුරුත් රැගෙන යෑමට මේ වන තෙක් මැදවච්චිය වනජීවී නිලධාරීන් කටයුතු නොකළ බවත් නිවෙසේ හිමිකරු ඩබ්ලිව්. කේ.එස්. ජයවර්ධන මහතා පැවැසීය.

එලෙස කටයුතු කරන වනජීවී නිලධාරීන් කිඹුලාගේ ජීවිතයට අනතුරක් වුවහොත් වගකිව යුතු බවද ඒ මහතා සඳහන් කළේය.

පසුගිය 4 වැනිදා උදෑසන ගේ හිමියාගේ බිරිය නිවෙස පිටුපස පිහිටි ළිඳෙන් ජලය රැගෙන ඒමට ගොස් ඇත. එම අවස්ථාවේ ළිඳේ කිඹුලකු වැටී සිටින බව දැක ගේ හිමියා වෙත බිරිය දැනුවත් කර තිබේ.

ඩබ්ලිව්. කේ. එස්. ජයවර්ධන මහතා මෙසේ පැවැසීය.

“ළිඳට වැටී සිටි කිඹුලා ප්‍රදේශවාසීන් සමඟ එක්ව ගොඩට අරගෙන දින 2ක් ගත වුවත් වනජීවී නිලධාරීන් පැමිණ එම කිඹුලා ගෙන යෑමට කටයුතු කළේ නෑ. මට ළිඳේ වතුර ඉහා ගන්න තෙල් ගේන්න සල්ලි තිබුණේ නෑ. මම බිරියගේ මුද්දක් රුපියල් 7,000ට උකස් කරලා ඒකෙන් තෙල් අරන් ඇවිත් ළිඳේ ජලය දින දෙකක් පුරා ඉස්සා. අනතුරුව 6 වැනිදා සවස 4.30ට පමණ කිඹුලා ලණුවලින් ගැට ගහලා ගොඩට ගත්තා.

දැන් මේ සතාව ලෙහන්නත් බෑ. මොකද මේ සතා දැන් මාස 3ක් පමණ ගමට ඇවිත් එළුවන්, බල්ලන් අල්ලගෙන කනවා. මේ කිඹුලා දැන් ඒකට පුරුදු වෙලා ඉන්නේ. අපිවත් කන්න ඉඩ තියෙනවා මේ සතා. ඉතින් ළඟ තැනකට සතා නිදහස් කරලා බෑ. අපිට නැවත කරදරවලට මුහුණ දෙන්න වෙනවා. මේ සතා අරන් යන්න කියලා අපි වනජීවී නිලධාරීන්ට කිව්වා. ඒ අය කියනවා කිඹුලා අරන් යන්න වාහන නෑ කියලා. අපි ඒ අයට කියනවා මේ සතාගේ ජීවිතයට හානියක් වුණොත් ඒ වගකීමත් භාරගන්න සූදානම් වෙන්න කියලා.”

මේ පිළිබඳ අපි මැදවච්චිය වනජීවී නිලධාරි ප්‍රියංකර මහතාගෙන් විමසීමක් කළෙමු.

“අපිව මේ පිළිබඳ දැනුවත් කළා ගම්මානේ අය. මේ කිඹුලා ඒ අසල ඇළකට නිදහස් කරන්න මේ අය කැමැති නෑ. ඒ නිසා මේ කිඹුලව අපට විල්පත්තු රක්ෂිතයට ගෙනියන්න වෙනවා. ඒත් අපිට වාහන නෑ. ඒකයි මේ ප්‍රමාදය. මම ඒ පිළිබඳ අනුරාධපුර කාර්යාලයත් දැනුවත් කළා.”

මැදවච්චිය _ ගයාන්