කුරුණෑගල ඛේදවාචකය: මානව හිමිකම් නිලධාරීන් ස්ථාන නිරීක්ෂණයක – මව්පියනුත් හමුවෙති

0
210

කුරුණෑගල, වැහැර ප්‍රදේශයේ අතුරු මාර්ගයක කාණුවකට ඇද වැටී 14 හැවිරිදි පාසල් සිසුවෙකු මිය යාමේ සිද්ධිය වූ ස්ථානය නිරීක්ෂණය කිරීම සඳහා ශ්‍රී ලංකා මානව හිමිකම් කොමිෂන් සභාවේ ජ්‍යෙෂ්ඨ නිලධාරීන් පිරිසක් අද චාරිකාවක නිරත වූහ.

එහි ජ්‍යෙෂ්ඨ නිලධාරීවරයෙකු mawbima.lk වෙත ප්‍රකාශ කළේ, අනතුර සිදුවූ ස්ථානය නිරීක්ෂණය කිරීමෙන් අනතුරුව, මිය ගිය සිසුවාගේ නිවසට ගොස් ඔහුගේ දෙමාපියන් ද හමුවූ බව ය.

මෙම ඛේදවාචකය සම්බන්ධයෙන් විමර්ශනයක් ආරම්භ කිරීමට ශ්‍රී ලංකා මානව හිමිකම් කොමිෂන් සභාව ඊයේ තීරණය කළේය.

එහි ජ්‍යෙෂ්ඨ නිලධාරිවරයෙකු mawbima.lk වෙත ප්‍රකාශ කළේ, ඊට අදාළ පාර්ශව කැඳවා විමර්ශනයක් පවත්වන බව ය.
සැප්තැම්බර් 5 වන දා දහවල් 2.00ට පමණ පාසල නිම වී අතුරු මාර්ගයක් ඔස්සේ සිය නිවස වෙත යමින් සිටි අදාළ සිසුවා මාර්ගයේ පටු ස්ථානයකදී එම මාර්ගයේ පැමිණි වාහනයකට ඉඩ දීම සඳහා කාණුවේ ගැට්ට මතට ගොඩ වන විට ඔහුගේ පය ලිස්සා ඒ තුළට ඇද වැටී ඇති බව වාර්තාකරු ප්‍රකාශ කළේ ය.

කුරුණෑගල මහ නගර සභාවේ සේවකයින්, ප්‍රදේශ වාසීන් සහ පොලිසිය එක්ව මහත් පරිශ්‍රමයක් දරා එම පාසල් සිසුවා ගොඩට ගෙන තිබිණි.

අප වාර්තාකරු සඳහන් කළේ, බැකෝ යන්ත්‍රයක් යොදා ගනිමින් කාණුවේ කොන්ක්‍රීට් තට්ටු ඉවත් කර සිසුවා ගොඩ ගෙන ඇති අතර එම අවස්ථාවේදී ඔහු බරපතළ තත්ත්වයේ සිටි බව ය.

මුදා ගැනීමෙන් පසුව ඔහු කුරුණෑගල ශික්ෂණ රෝහලට ඇතුළත් කිරීමට කටයුතු කර ඇති අතර එහිදී ඔහු ජීවිතක්ෂයට පත් වී තිබිණි.