අපි හැමෝම කිව්වේ ගීතානි මිස් අපේ දෙවැනි අම්මා කියලයි

0
52

කිසිවකු නොසිතූ මොහොතක මාරක රිය අනතුරකින් ජීවිතක්ෂයට පත් ප්‍රවීණ කොරියානු භාෂා උපදේශකවරියගේ අකල් වියෝව කන වැකුණු ගෝනහේන අවට ප්‍රදේශයේ බාල, තරුණ, මහලු සැමදෙනා ඒ පිළිබඳව කතා කළේ දැඩි වේදනාවකිනි.

ඉකුත් 23 වැනිදා රාත්‍රියේ කොළඹ සිට පිටත වටරවුම් මාර්ගයේ කිලෝමීටර් 16.1 සපුගස්කන්ද ප්‍රදේශයේ ටයිල් පැටවූ ලොරි රථයක සුඛෝපභෝගී රථයක් ගැටීමෙන් මෙසේ සදහටම මෙලොවින් සමුගත්තේ කඩවත රම්මුතුගල, ගෝනහේන ප්‍රදේශයේ පදිංචිව සිටි ප්‍රවීණ කොරියානු භාෂා උපදේශකවරියක් වන ගීතානි මානෙල් ප්‍රියන්ති බණ්ඩාර නමැති 47 හැවිරිදි එක් දරු මවකි. අනතුරින් එම ජීප් රථය පැද වූ රියැදුරාටද සුළු තුවාල වී තිබෙන අතර ඔහු මෙම කොරියානු භාෂා උපදේශකවරියගෙන් කොරියානු භාෂාව උගත් ශිෂ්‍යයෙකි.

ප්‍රියන්ති බණ්ඩාර මහත්මිය ඉඹුල්ගොඩ රාජසිංහ මහා විද්‍යාලයෙන් උසස් පෙළ සමත්වීමෙන් පසු 1992 වසරේදී පාසල් ජීවිතයට සමුදුන්නාය. ඇයට සරසවි වරම් හිමිව තිබුණත් සරසවි අධ්‍යාපනයට නොගොස් 1995 වර්ෂයේදී ඇය 1995 කොරියාවට ගියාය. එහිදී කොරියන් භාෂාව හදාරමින් විවිධ ආයතනවල රැකියාව කරමින් වසර 15ක පමණ කාලයක් සේවය කර 2008 වසරේදී නැවත මවුබිමට පැමිණියාය.

ඇය කොරියාවේ ගත කළ කාලය තුළ එහිදී දැනහඳුනාගත් මාතලේ ගාමිණී බණ්ඩාර සමඟ විවාහ දිවියට පා තැබුවාය. මේ වන විට එම යුවළට මෙතුලි මෙතුන්සා බණ්ඩාර නමින් වයස අවුරුදු හයක දියණියක සිටී. ඇය ජාත්‍යන්තර පාසලක අධ්‍යාපනය ලබන්නීය. මේ කාල සීමාව තුළ ගීතානි කොරියානු විශ්වවිද්‍යාලයකින් කොරියානු භාෂාව පිළිබඳව උපාධියක්ද ලැබුවාය.

කොරියානු භාෂාව පිළිබඳව උපාධියක් ලබා මෙරටට පැමිණි ඇය 2010 වසරේදී රජයේ විදේශ සේවා කාර්යාංශයේ කොරියානු භාෂා උපදේශිකාවක් ලෙස පත්වීම් ලබා මාතර දිස්ත්‍රික්කයේ රජයේ පාසල්වල සිසු දරුවන්ට කොරියානු භාෂාව ඉගැන්වීමේ නියැළුණාය. ඒ අතරතුර එම සිසුන්ගේ දැඩි ඉල්ලීම මත කොරියන් භාෂා උපකාරක පන්තියක් පැවැත්වූවාය. අගහිඟකම් ඇති දරුවන් හඳුනාගෙන ඔවුන්ගේ අධ්‍යාපන කටයුතුවලට මෙන්ම එම පවුල්වලටද ඇය විවිධ ආකාරයෙන් උදවු උපකාර කළාය.

පසුගිය සුනාමි සමයේ මාතර, ගන්දර හා අවට ප්‍රදේශවල විශේෂයෙන් ධීවර පවුල්වලට වියළි ආහාර ලබා දුන්නාය. ඇයගෙන් කොරියානු භාෂාව ඉගෙනගෙන කොරියාවට යන තරුණ තරුණියන්ට මුදල් අඩුපාඩු ඇති අවස්ථාවලදී ඇය තමාගේ මුදල් ලබාදී තිබෙන අතර කොරියාවේ රැකියාව කරන තරුණ තරුණියන් සිය ආයතන සමඟ ඇති කරගන්නා ගැටලුවලදී ඇය මැදිහත්ව එම ගැටලු විස¼දා දීමට කටයුතු කර ඇති අවස්ථාද එමටය.

ඇයගේ අභාවය ගැන ශෝකවන ඇගේ සොයුරිය වන ඉන්දියන් ගුවන් සේවයේ සේවය කරන මාරබගේ කුමුදුනී සඳමාලි (45) මහත්මිය සිය සොයුරිය ගැන මෙසේ කීවාය.

“අපේ තාත්තා අපි කුඩා කාලයේ මියගියා. අක්කාගේ උත්සාහයෙන් ඇය මේ තත්ත්වයට ආවේ. එයා කොරියානු විශ්වවිද්‍යාලයකින් උපාධියක් ලබාගත්තා. අක්කා ධෛර්යවත් කාන්තාවක්. කොරියානු භාෂා උපදේශිකාවක් ලෙස මාතර දිස්ත්‍රික්කයේ කොරියානු භාෂාව ඉගැන්වීමට කටයුතු කළා. එම ප්‍රදේශයේ සිසුන් අතර ඇය ජනප්‍රිය වුණා. ඇය ඇගේ සිසුන්ට උපදේශිකාවක් විතරක් නොවෙයි. දෙවැනි අම්මා වුණා. අක්කා මාතර නැවතිලයි ඉගැන්වීමේ කටයුතු කළේ. නමුත් අක්කාගේ දුව ගම්පහ ප්‍රදේශයේ ජාත්‍යන්තර පාසලකට ඇතුළු කළ නිසා අක්කා ගෝනහේන නිවෙසේ ඉඳලා මාතර ගියා. සිද්ධිය වූ දින (23දා) අලුයම 5.00ට පමණ අක්කා මාතර යන්න පිටත් වුණා. එදින සවස ඉගැන්වීමේ කටයුතු ඉවර කරලා අක්කා බස් එකේ එන්නයි හිටියේ. අක්කගෙන් ඉගෙන ගත්ත ගෝලයෙක් තමා රියැදුරු විදිහට වැඩ කළේ. අක්කට මහන්සි හින්දා රියැදුරු මල්ලි කිව්වා ජීප් එකෙන් ඇරලවන්නම් කියලා. ඒ අනුව අක්කා ජීප් එකේ ආවා.

රාත්‍රි 9.00ට විතර අක්කාගේ දුව අක්කාගේ දුරකථනයට කෝල් කළා. නමුත් අක්කා කතා කළේ නැහැ. ඒ සමඟම රියැදුරු කිව්වා ඇය නිදි කියලා. අපි විනාඩි දහයෙන් ගෙදර කියලත් රියැදුරු මල්ලි කිව්වා. ටික වේලාවකින් අනතුර ගැන අපිට ආරංචි වුණා.”

අකුරැස්සේ තරිඳු දමිත් (20)

මම මැඩම්ගෙන් වසර හතරක් කොරියානු භාෂාව ඉගෙන ගත්තා. ඇය පන්තියට ඇවිත් අපට උගන්වන ආකාරයට අපට හොඳින් ධාරණය වෙනවා. දකුණේ භාෂාව මැඩම්ට හොඳින් හුරු වුණා. මනසින් වැටුණු දරුවන් ගොඩගත්තා. ඒ නිසා අපේ දෙවැනි අම්මා කියලයි අපි මැඩම්ට කිව්වේ. එතුමියගේ අභාවය කොරියන් භාෂාව හැදෑරීමට අපේක්ෂා කරන තරුණ තරුණියන්ට දැරිය නොහැකි පාඩුවක්. කිසිවකු නොසිතූ මොහොතක දෛවයේ සරදමට ලක් වූ ප්‍රවීණ කොරියානු භාෂා උපදේශිකා ගීතානි මානෙල් ප්‍රියන්ති බණ්ඩාර මහත්මිය මුළු ගමක් හඬවා අද (26දා)  මෙලොවින් සමුගනියි.

ඇගේ අවසන් කටයුතු අද (26දා) පස්වරුවේ ගෝනහේන  රුප්පාගොඩ පොදු සුසාන භූමියේදී සිදු කෙරේ.

දෙල්ගොඩ බිහදු විනුවර,

බියගම කේ. දුමින්ද