මන්ත්‍රින්ට අල්ලස් දීම ගැන විමර්ශන නවතී

0
25

අගමැති ධුරය වෙනස් කිරීමෙන් 2018 ඔක්තෝබරයේ හටගත් ව්‍යවස්ථා අර්බුදය අවස්ථාවේ පාර්ලිමේන්තු මන්ත්‍රිවරුන් පිරිසකට මූල්‍ය අල්ලස් දීමට තැත් කළ බවට එවක ජනපති මෛත්‍රිපාල සිරිසේන කළ ප්‍රකාශයට අදාළව කෙරුණු පැමිණිල්ල පදනම් කරගෙන අල්ලස් හෝ දූෂණ චෝදනා විමර්ශන කොමිෂන් සභාව ඉදිරියට විමර්ශන නොකරන බව ප්‍රකාශ කර ඇත.

සිදුවීමට අදාළව අල්ලස් පනත යටතේ ක්‍රියාකිරීමට තරම් ප්‍රමාණවත් කරුණු අනාවරණය නොවීම හේතුවෙන් මෙම තීරණය ගත් බව අල්ලස් හෝ දූෂණ චෝදනා විමර්ශන කොමිසම පවසයි.

අල්ලස් හෝ දූෂණ චෝදනා විමර්ශන කොමිසම මේ බව ප්‍රකාශ කර තිබුණේ සිදුවීමට අදාළ පැමිණිලිකරු වූ ට්‍රාන්ස්පේරන්සි ඉන්ටර්නැෂනල් ශ්‍රී  ලංකා ආයතනය කළ විමසීමකට පිළිතුරු වශයෙනි. හිටපු ජනාධිපති මෛත්‍රිපාල සිරිසේන 2018 ඔක්තෝබර් 26 වැනිදා මහින්ද රාජපක්ෂ මහතාට අගමැති ධුරය පිරිනැමීමෙන් පසු හටගත් ආණ්ඩුකරණ අර්බුද සමයේදී විපක්ෂයේ මන්ත්‍රිවරුන් බිලීබා ගැනීමේ උත්සාහයක් ගැන කියැවෙන දුරකථන හඬපට කිහිපයක් එක්සත් ජාතික පක්ෂය ප්‍රසිද්ධ කරනු ලැබීය.

පසුව මේ සිදුවීම ගැන හිටපු ජනපති මෛත්‍රිපාල සිරිසේන මහතාද ප්‍රකාශයක් කළේය.

මෙම හඬ පට හා හිටපු ජනාධිපතිවරයාගේ ප්‍රකාශය පදනම් කරගෙන අදාළ සිදුවීම ගැන නීතිමය පියවර ගන්නැයි ඉල්ලමින් ට්‍රාන්ස්පේරන්සි ඉන්ටනැෂනල් ශ්‍රී  ලංකා ආයතනය 2018 නොවැම්බර් 5 වැනි දින අල්ලස් හෝ දූෂණ චෝදනා විමර්ශන කොමිෂන් සභාවට පැමිණිල්ලක් ඉදිරිපත් කරන ලදී.

ඒ අනුව අදාළ සිදුවීම පදනම් කරගෙන අල්ලස් පනත යටතේ තවදුරටත් ක්‍රියා කළ නොහැකි බව වසර තුනකුත් මාස 10කට පසුව අල්ලස් හෝ දූෂණ චෝදනා විමර්ශන කොමිෂන් සභාව ලිඛිතව පැමිණිලිකරුට දන්වා ඇත.