“අයහපත් කාලගුණය ලබන 10 වන දා දක්වා පමණයි” – කාලගුණ විද්‍යා දෙපාර්තමේන්තුව

0
117

නිරිතදිග මෝසම් සුළං සක්‍රීය වීමෙන් දිවයිනේ උද්ගතව ඇති අයහපත් කාලගුණික තත්ත්වය ලබන හත් වන දා සිට කෙමෙන් අඩු වී දහ වනදායින් පසුව පහව යනු ඇතැයි කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක පවසයි.

අද (අගෝ. 5) රජයේ ප්‍රවෘත්ති දෙපාර්තමේන්තුවේ පැවති මාධ්‍ය සාකච්ඡාවකට එක්වෙමින් ඔහු මේ බව සඳහන් කළේ ය.

ආපදා තත්ත්වය නිසා දිස්ත්‍රික්ක 10ක, ප්‍රාදේශීය ලේකම් කොට්ඨාස 65ක, පවුල් 3471ක් සහ පුද්ගලයින් 13, 739ක් පීඩාවට පත්ව ඇති බව ආපදා කළමනාකරණ මධ්‍යස්ථානයේ විශේෂ දැනුවත් කිරීම් අධ්‍යක්ෂ සුගත් දිසානායක පැවසීය.

මේ වන විට මිය ගිය සංඛ්‍යාව පස් දෙනෙකි. ආපදාවට පත් අය සුරක්ෂිත මධ්‍යස්ථාන 12කට යොමු කර ඇත.

මධ්‍යස්ථානවල සිටින පිරිසට ආහාර පාන සනීපාරක්ෂක පහසුකම් ඇතුළු සියලු පහසුකම් ලබා දී තිබේ.

දිස්ත්‍රික් ලේකම් කාර්යාල විසිපහේ දිස්ත්‍රික් ආපදාකළමනාකරණ ඒකක 25 සහ ජාතික ආපදා සහන සේවා මධ්‍යස්ථානය ඒකාබද්ධව දිස්ත්‍රික් ලේකම්වරුන් හා ප්‍රාදේශීය ලේකම්වරු ඊට සහය වෙති.

ත්‍රිවිධ හමුදාව, පොලිසිය, රාජ්‍ය නොවන සංවිධාන හා ආයතන රැසක් ඊට එක්ව සිටියි.

සම්පූර්ණ නිවාස හානි 1ක් සහ අර්ධ හානි 1149 ක් සිදුව තිබේ.

නාය යාම් අනතුරු සම්බන්ධව රතු නිවේදන හා දෙවන මට්ටම අනතුරු ඇඟවීම් සිදු කර ඇති අතර දැනට හම්බන්තොට, කෑගල්ල, මාතර, නුවරඑළිය සහ රත්නපුර යන දිස්ත්‍රික්කවලට රතු නිවේදන සහ පූර්ව දැනුම්දීම් කර ඇත.

රතු නිවේදන නිකුත් කර ඇති ප්‍රදේශවල ජනයා ඉවත් විය යුතු අතර දෙවන මට්ටමේ අනතුරු ඇඟවීම් අදාළ වන පිරිස ඉවත්වීමට සූදානම් වී සිටිය යුතු ය.

බිත්තිවල ඉරිතැලීම් ආදි ලක්ෂණ සම්බන්ධයෙන් අවධානයෙන් සිටින ලෙසත් මාධ්‍ය දැනුවත් කිරීමට එක්වෙමින් ජාතික ගොඩනැගිලි පර්යේෂණ සංවිධානයේ අධ්‍යක්ෂ ජනරාල් ආචාර්ය ආසිරි කරුණාවර්ධන පැවසීය.

කළු, නිල්වලා, කැලණි ගංගාවල ජල මට්ටම හා මහවැලි ද්‍රෝණිවල ජල මට්ටම ඉහළ ගොස් ඇති අතර අවට ප්‍රදේශවල පදිංචිකරුවන් අවධානයෙන් සිටිය යුතු බව වාරිමාර්ග දෙපාර්තමේන්තුවේ ප්‍රධාන ඉංජිනේරු ශෂික ඉරේෂ් පෙන්වා දුන්නේය.

ඕනෑ ම ආපදා අවස්ථාවකදී 117 අමතන ලෙස ආපදා කළමණාකරණ දෙපාර්තමේන්තුව දැනුම් දෙයි.