සාහිත කෙත අස්වැද්දූ සරත්සඳ

0
21

ඔහු කෘතහස්ත පරිවර්තකයෙකි. විශිෂ්ට භාෂාඥයෙකි. ප්‍රතිභාපූර්ණ කවියෙකි. සිසු අඹරේ ගුරු තරුවක් මෙන්ම ප්‍රවීණ ජේ‍යාතිර්වේදියෙකි. මේ සියල්ල එකට කැටි කර ගනිමින් සිංහල විශ්වකෝෂයේ කර්තෘවරයා ලෙස කටයුතු කළ ආචාර්ය සරත්චන්ද්‍ර ජයකොඩි වඩාත් ප්‍රසිද්ධියට පත්ව සිටියේ නිරහංකාර අව්‍යාජ ගැමියකු ලෙසිනි.

සරත්චන්ද්‍ර ජයකොඩි සූරීන් මියගොස් අගෝස්තු 08 වැනිදාට වසර 13ක් සපිරෙතත් තවමත් ඔහු පිළිබඳ මතකය අලුත් කිරීමට තරම් රයිගම් කෝරළ ජනතාව සැදී පැහැදී සිටීම අගය කළ යුතුමය.

හඳපාන්ගොඩ මහ විදුහලෙන් අධ්‍යාපනය අරඹා, කුඩාඋඩුවේ නාලන්දා පිරිවෙන, හොරණ තක්ෂිලාව හරහා විදුදය සරසවිය කරා ගොස් ශාස්ත්‍රවේදී උපාධියක් ලබමින් අධ්‍යාපන ගමන නිමා කළ සරත්චන්ද්‍රයන්ට මුලින්ම රැකියාව ලෙස ලැබුණේ තුනීලෑලි සංස්ථාවේ විධායක නිලධාරි තනතුරකි. උපතින්ම කලාවට ළැදි වූ සරත්චන්ද්‍රයන්ට තුනීලෑලි සංස්ථාව ඒ තරම් හිතට ඇල්ලුවේ නැත. ඒ නිසාම ඔහු හැකි ඉක්මනින්ම සංස්කෘතික දෙපාර්තමේන්තුවේ රැකියාවක් ලබා ගත්තේය. සිංහල විශ්වකෝෂයේ සහකාර කර්තෘවරයකු ලෙස පත්වීමක් ලද ඔහු ඒ ඔස්සේ තමන්ට හැකි උපරිම අයුරින් සිය සේවය ඉටුකරන අතරම උපතින්ම ලබා සිටි හපන්කම් සාහිත්‍යය පෝෂණයට යොමු කළේය.

සරත්චන්ද්‍රයන්ගේ මුල්ම කෘතිය ළමා කතාවකි. ‘බින්දු බින්දු මල්’ නමින් ලියූ එම කෘතියට රාජ්‍ය සම්මාන හිමිවිය.

අනතුරුව, ‘හිත හොඳ හාවා’, ‘සාමාගේ කතාව’, ‘පිංතාලිය’ වැනි ළමා කතා කිහිපයක්ම ලියූ ඔහු පසුව ඉන් ඔබ්බට ගොස් නවකතා, කෙටිකතා, ජේ‍යාතිෂ ග්‍රන්ථ, ඓතිහාසික ග්‍රන්ථ ආදී කතා රැසක්ම ලියා පළ කළේය.

විශ්ව ශක්තිය පිළිබඳව ලියූ කුණ්ඩලන ග්‍රන්ථයෙන්ද ‘ආඝෝර’ පරිවර්තන කෘතියෙන්ද පාඨක හද බැඳගත් ඔහු රචනා කළ කෘති සංඛ්‍යාව 67කි.

සිංහල, ඉංග්‍රීසි, පාලි, සංස්කෘත දෙමළ ආදී භාෂා රැසක්ම ප්‍රගුණ කර සිටි සරත්චන්ද්‍රයන් අගනුවර තරුණ කවි සමාජයේ ජනප්‍රියම කවියකුද විය.

 ඕනෑම කෙනකුගේ කේන්දර සටහනක් අතට ගෙන බැලූ පමණින් ඒ පුද්ගලයාගේ ඉතිහාසයත්, වර්තමානයත්, අනාගතයත් තත්පර කිහිපයකදී පැවැසීමට තරම් දස්කම් පෑ මොහුගෙන් නක්ෂත්‍ර කටයුතු කරගැනීමට සති අන්තයේ සහ නිවාඩු දිනවල පැමිණෙන පිරිස් අතිවිශාලය. ඒ කිසිවකුගෙන් හෝ ගුරු පඬුරක් ලෙසවත් කිසිම මුදලක් නොගත් මොහු පැමිණෙන සැමටම වෙලාවේ හැටියට බත බුලතින්, තේ පැන්වලින් සංග්‍රහ කිරීමට තරම් නිර්ලෝභී විය.

මෙරට සියලුම ජාතික පුවත්පත් සරත්චන්ද්‍ර ජයකොඩි මහතාව ඉහළම ලංසුවක් තබා රැකගත් අතර එකල සතිපතා පුවත්පතකට ලියූ ‘සංසාර සිහින’ මහ දිග කතාව ඉතා ජනප්‍රිය විය.

ඔහු විසින් පරිවර්තනය කරන ලද විශ්ව සාහිත්‍යයේ සම්භාවනීය කෘති රැසක්ම අදත් පාඨකයන් අතර ඉමහත් පැසසුමට ලක්වෙමින් පවතී.

එදා උසස් පෙළ සමත් වූ සරත්චන්ද්‍ර ජයකොඩි තමන් ඉගෙනුම ලැබූ තක්ෂිලා විදුහලෙන් සමුගන්නා අවස්ථාවේදී අසල තිබූ හුනු කූරක් ගෙන කළු ලෑල්ලක ලියූ කවිය අද තක්ෂිලාවේ තේමා ගීතය වෙතැයි ඔහු එදා නොසිතන්නට ඇත.

‘සම මෙත් සිතින් ඔබ තුරුලට කතා කොට ගමනක සුබ ලකුණු පෙන්වූ  එදා සිට

හැම සම්පතක් දුන් ඉරහඳ දැකී මට

මම ආදරෙයි කවදත් තක්ෂිලා වට

මේ කවිය අදත් සැමදා උදෑසන තක්ෂිලාව ඇරඹීමට පෙර සිසු සිසුවියන් දහස් ගණනකගේ මුවින් පිටවන්නේ සරත්චන්ද්‍ර නාමයට තවත් ගෞරවයක් එක් කරමිනි.

හරිශ්චන්ද්‍ර කහවල