ආර්ථිකය ගොඩ ගන්න එක්ව කටයුතු කරමු

0
153

රජය සහ මහ බැංකුව මහජනතාව මත පවතින ආර්ථික දුෂ්කරතාවන් අඩු කිරීම සඳහා විවිධ ක්‍රියාමාර්ග ගනිමින් සිටී. වත්මන් අර්බුදයට සහ එහි ප්‍රතිඵලයක් ලෙස පවතින දුෂ්කරතාවලට දායක වන එක් ප්‍රධාන සාධකයක් වනුයේ බැංකු පද්ධතිය තුළ විදේශ විනිමය ද්‍රවශීලතාව නොමැතිකමයි. විදේශ විනිමය ද්‍රවශීලතාවයේ හිඟය ඉන්ධන ඇතුළු අත්‍යවශ්‍ය ආනයන සැපයීමට බලපා ඇත. බැංකු පද්ධතිය තුළ ප්‍රමාණවත් විදේශ විනිමය ද්‍රවශීලතාවක් සහතික කිරීම සඳහා, අපනයන ඉපැයීම් රුපියල්වලට පරිවර්තනය කිරීමේ අවශ්‍යතා පැනවීමට මහ බැංකුවට සිදු විය.

තවද, විදේශ විනිමය පිටතට ගලායෑම අධෛර්යවත් කිරීම සඳහා රජය සහ මහ බැංකුව විසින් ඇතැම් ආනයන හා ගෙවීම් ක්‍රම මත සීමා පැනවීම සහ ආන්තික අවශ්‍යතා හඳුන්වාදීම් මෙන්ම, අවිධිමත් විදේශ විනිමය වෙළෙඳපොළ හරහා ගමන් නොකර විධිමත් බැංකු පද්ධතිය වෙත විදේශ විනිමය ගලා ඒම දිරිමත් කිරීම වැනි ක්‍රියාමාර්ගයන් ගෙන ඇත. මෙම නියාමන ක්‍රියාමාර්ගවල සාර්ථකත්වය සහ අපේක්ෂිත ප්‍රතිඵල ලබා ගැනීමේ හැකියාව රඳා පවතින්නේ වෙළෙඳ ප්‍රජාවේ සහ බැංකු පද්ධතියෙන් ලැබෙන සහයෝගය සහ සහයෝගීතාව මතය.

කෙසේ වෙතත්, ඇතැම් වෙළෙඳපොළ පාර්ශ්වකරුවන් මෙම රෙගුලාසිවලට සම්පූර්ණයෙන්ම අනුකූල නොවන බව ශ්‍රී ලංකා මහ බැංකුවේ අවධානයට ලක්ව ඇත. එවැනි ක්‍රියාවක් අඛණ්ඩව කරගෙන ගියහොත්, දුෂ්කර හා අසාමාන්‍ය තත්ත්වයන් යටතේ සියලුම පාර්ශ්වකරුවන්ගෙන් බලාපොරොත්තු වන ‘සමසේ විඳ දරා ගැනීමේ’ සදාචාරාත්මක වගකීම යටපත් කරන අතරම, දුෂ්කර කාලවලදී රජයෙන් අපේක්ෂා කරන සහයෝගය ජනතාවට අහිමි වනු ඇත.

මෙවැනි පසුබිමක් තුළ, ජාතියේ යහපත උදෙසා සියලු රෙගුලාසිවලට අනුකූල වීම දැඩි ලෙස නිරීක්ෂණය කිරීමට හැකි වන පරිදි ගත හැකි සෑම පියවරක්ම ඉදිරියේදීත් ගන්නා බව ආර්ථිකයේ සියලුම පාර්ශ්වකරුවන් හට නැවත අවධාරණය කිරීමට මහ බැංකුව අපේක්ෂා කරයි. රෙගුලාසිවලට අනුකූල නොවන ක්‍රියාවක් හඳුනාගනු ලැබුවහොත්, අදාළ නීතිමය විධිවිධාන තුළ දැඩි ක්‍රියාමාර්ග ගනු ලැබෙනු ඇත.

එබැවින්, දැනට පවතින රෙගුලාසිවලට අනුකූලව කටයුතු කරන ලෙස බලපත්‍රලාභී බැංකු සහ වෙළෙඳ ප්‍රජාව වෙතින් ඉල්ලා සිටින අතර, අතිශය අභියෝගාත්මක තත්ත්වයන් යටතේ ආර්ථිකයේ සියලුම පාර්ශ්වකරුවන්ට අවශ්‍ය සහාය ලබාදීමට රජය සහ මහ බැංකුව දරන ප්‍රයත්නයන්ට දායක වන ලෙසද ඉල්ලා සිටී. නියමිත කාල සීමාව තුළ සියලුම අපනයන ආදායම නැවත මෙරටට ගෙන්වා ගැනීමටත් රෙගුලාසිවලට අනුකූලව ඉතිරි ඉපැයීම් බැංකු පද්ධතිය හරහා රුපියල්වලට පරිවර්තනය කරන ලෙසත් අපනයන වෙළෙඳ ප්‍රජාවට නියම කර ඇත. විදේශ විනිමය ගනුදෙනු සම්බන්ධයෙන් වන සියලුම රෙගුලාසි දැඩි ලෙස පිළිපැදීම සහතික කරන ලෙස බැංකු ප්‍රජාවගෙන් ඉල්ලා සිටී.

රජය සහ මහ බැංකුව නුදුරු කාලීනව ආර්ථික පීඩනයන් සමනය කිරීමට අවශ්‍ය විදේශීය මූල්‍ය සුරක්ෂිත කිරීම සඳහා අඛණ්ඩ උත්සාහයන් ගනිමින් සිටී. ආර්ථික ගැළපුම් වැඩසටහනක් සඳහා ජාත්‍යන්තර මූල්‍ය අරමුදල සමඟ කෙරෙන සාකච්ඡාවල කැපී පෙනෙන ප්‍රගතියක් දක්නට ඇත. නීති සහ මූල්‍ය උපදේශකයන්ගේ සහාය ඇතිව ණය ප්‍රතිව්‍යුහගත කිරීමේ ක්‍රියාවලිය ක්‍රියාත්මක වෙමින් පවතී. ආර්ථිකයේ දිගුකාලීන ව්‍යුහාත්මක ගැටලු මඟහරවා ගැනීම සඳහා අවශ්‍ය ප්‍රතිසංස්කරණ ක්‍රියාත්මක කිරීමට රජය සහ මහ බැංකුව කැපවී සිටී.

වත්මන් ආර්ථික දුෂ්කරතා සහ පීඩාවන් ජය ගැනීම සඳහා සියලුම පාර්ශ්වකරුවන්ගෙන් සැලකිය යුතු සහ සාමූහික උත්සාහයක් අවශ්‍ය බව මහ බැංකුව නැවත අවධාරණය කරයි. ඕනෑම පාර්ශ්වකරුවන් කණ්ඩායමක වැරදි ක්‍රියා නිසා ආර්ථික අර්බුදය උග්‍රවීම නොවැළැක්විය හැකි අතර එමඟින් පුළුල්ව පැතිරුණු අහිතකර බලපෑම් ඇති කරනු ඇත.

ජාතිය ඉක්මනින් යථා තත්ත්වයට පත් වීමට සහ මෙම අර්බුදයෙන් ශක්තිමත්ව නැඟී සිටීම සඳහා හෘද සාක්ෂියට එකඟව වගකීමෙන් යුතුව කටයුතු කිරීමත්, මෙම අවශ්‍ය මොහොතේදී නොපිරිහෙළා සහාය දැක්වීමත් සැමගේ යුතුකම බවයි මහ බැංකුව අවධාරණය කරන්නේ. එබැවින් සියලු දෙනා පවතින තත්ත්වයෙන් ගොඩ ඒමට සාමුහිකව කටයුතු කළ යුතුව ඇත.