මන්ත්‍රී 225ට ම ජනපති ලියුමකින් කළ ආරාධනාව

0
315

ආර්ථික හා සමාජයීය ස්ථාවරත්වය ඇති කිරීම සඳහා ජාතික සර්වපාක්ෂික වැඩපිළිවෙළක් ගොඩනැගීමට එකතුවන්නැයි ජනාධිපති රනිල් වික්‍රමසිංහ සියලු ම පාර්ලිමේන්තු මන්ත්‍රීවරුන්ට ලිපියක් යොමු කරමින් ඉල්ලීමක් කර තිබේ.

එම මන්ත්‍රීවරුන් නියෝජනය කරන දේශපාලන පක්ෂවල සහය මෙම පොදු වැඩපිළිවෙළට ලබා දෙන්නැයි ද ඉල්ලමින් යොමු කර ඇති එම ලිපිය මෙසේ ය.

“අප රට මුහුණ පා ඇති ආර්ථික අර්බුදයට සමගාමීව රට තුළ නිර්මාණය වූ දේශපාලනික හා සමාජයීය අරාජිකත්වය මේ වන විට ක්‍රමයෙන් යථා තත්ත්වයට පත් කිරීම සඳහා රජය මහත් පරිශ්‍රමයක් දරමින් සිටී.

ඒ අනුව, ක්‍රමවත් ආර්ථික ප්‍රතිසංස්කරණ වැඩසටහනක් ක්‍රියාත්මක කිරීම සඳහා වන මූලික සැලසුම් සකස් කරමින් පවතින අතර, ආර්ථික ස්ථාවරත්වය ඇති කිරීම සඳහා අවශ්‍ය මූලික පියවර ද ගනිමින් සිටින්නෙමු.

කෙසේ වුව ද, අප හමුවේ පවතින අභියෝග සාර්ථකව ජය ගැනීම සඳහා පාර්ලිමේන්තුව නියෝජනය කරනු ලබන සියලු දේශපාලන පක්ෂ, විද්වත් කණ්ඩායම්, සිවිල් සංවිධාන ආදී සියලු ම පාර්ශ්වයන්ගේ සහභාගීත්වයෙන් වැඩපිළිවෙළක් ක්‍රියාත්මක කළ යුතු බව මාගේ අදහසයි. මේ මොහොතේ පොදු මහජනතාවගේ අභිප්‍රාය වන්නේ ද පාර්ලිමේන්තුව තුළ ඔවුන් නියෝජනය කරනු ලබන මහජන නියෝජිතයන් සියලු ම දෙනා පොදු වැඩපිළිවෙළක් ඔස්සේ රටේ ආර්ථික හා සමාජ අර්බුදයන්ට පිළියම් සෙවීමට කටයුතු කිරීම වේ. එය රජයේ සහ ඔබතුමාගේ ද යුතුකමකි.

ඒ අනුව, මෙම ජාතික වගකීම ඉටු කිරීම සඳහා 19 වන ආණ්ඩුක්‍රම ව්‍යවස්ථා සංශෝධනය සහ පාර්ලිමේන්තු අධීක්ෂණ කමිටු ක්‍රමය නැවත හඳුන්වා දීම ඇතුළු ඉදිරි පියවර පිළිබඳව පුළුල් සංවාදයක් ගොඩනැගීමට මා අදහස් කරන අතර, ඒ සඳහා ඔබතුමාගේ පක්ෂයේ එකඟතාව කඩිනමින් මා වෙත යොමු කරන මෙන් ගෞරවයෙන් ඉල්ලා සිටිමි.”