ජාතික ව්‍යාපාර විශිෂ්ටතා රන් සම්මානයෙන් Flexiprint පිදුම් ලබයි

0
21

ශ්‍රී ලාංකේය ඇසුරුම් නිෂ්පාදනයේ ප්‍රමුඛ පෙළේ සමාගමක් වන Flexiprint පෞද්ගලික සමාගම ලංකා ජාතික වාණිජ මණ්ඩලය සංවිධානය කළ ජාතික ව්‍යාපාර විශිෂ්ටතා (NBEA) 2021 සම්මාන උළෙලේදී මුද්‍රණ සහ ඒ ආශ්‍රිත සේවා අංශයේ රන් සම්මානයෙන් පිදුම් ලැබීය. කොළඹදී පැවැති සම්මාන උළෙලේදී සමාගමේ අධ්‍යක්ෂ ඉසුරු අබේවික්‍රම මහතා සහ කණ්ඩායම එම සම්මාන ලබා ගත්තේය. 1994දී ඇරැඹූ Flexiprint සමාගම වර්තමානයේදී දෙස් විදෙස් කීර්තියට පත් ඇසුරුම් නිෂ්පාදන ආයතනයකි.

දේශීය සහ විදේශීය තේ වෙළෙඳපොළට ඉතා උසස් තත්ත්වයේ තේ බෑග් ටැග් සහ තේ බෑග් කවර නිෂ්පාදනය කරන මෙම සමාගම ෆ්ලෙක්සොග්‍රැපි තාක්ෂණය සහ ජලය සමඟ මිශ්‍රකර ගත් (Water Base) තීන්ත භාවිතයෙන් ශ්‍රී ලංකාවේ ප්‍රථමවරට අගනා තේ ඇසුරුම් නිපදවයි. 1994දී එක් යන්ත්‍රයක් භාවිත කර සේවක සේවිකාවන් 10 දෙනකුගෙන් ඇරැඹූ Flexiprint ආයතනය වර්තමානයේදී යන්ත්‍ර අටකින් සහ 275කට ආසන්න කාර්ය මණ්ඩලයකින් සමන්විතය.

ඕනෑම ප්‍රමාණයක ඇනවුමක් කලට වේලාවට සැපැයීමට අවශ්‍ය විශිෂ්ට තාක්ෂණික දැනුම සමාගම සතුය. තේ බෑග් ටැග්, තේ බෑග් කවර සහ පීරමීඩ හැඩැති තේ කවර ඇතුළු විවිධාකාරයේ තේ ඇසුරුම් රැසක් Flexiprint සමාගමේ නිෂ්පාදන අතර වේ. පවතින අභියෝගාත්ම කාලයේදී පවා නිෂ්පාදන අවශ්‍යතා සැපිරීමට අදාළ උපක්‍රමික වැඩපිළිවෙළක් අනුව සමාගම ක්‍රියා කරයි.

එක් එක් පාරිභෝගික අවශ්‍යතා වෙන වෙනම හඳුනා ගෙන ඔවුන් අතර මනා සම්බන්ධතාවක් පවත්වමින් සේවා සැපයීම සමාගමේ සුවිශේෂත්වයකි. “මෙම සම්මානය අපගේ විශිෂ්ට නිෂ්පාදන සහ සේවා පිළිබඳව පවසන කදිම නිදසුනක්. ශ්‍රී ලංකාවට විදේශ විනිමය ගෙන එන ව්‍යාපාර ක්‍ෂේත්‍රයක කටයුතු කරන අපි ඉදිරියටත් විශිෂ්ට නිෂ්පාදන ඔස්සේ ලෝකය දිනා ගැනීමට සුදානම්. මේ අවස්ථාවේදී මෙම ජයග්‍රහණයට දායක වුණ අපගේ සේවක මණ්ඩලයට මගේ කෘතවේදීත්වය පිරිනමනවා.” කළමනාකරණ අධ්‍යක්ෂ සතිස් අබේවික්‍රම මහතා පැවැසීය.