ලෝකයේ පැවැත්ම උඩු යටිකුරු කරන සුපිරි පණුවා

0
94

ප්ලාස්ටික් ආහාරයට ගන්නා පණු විශේෂයක් පිළිබඳව ඔස්ට්‍රේලියානු විද්‍යාඥයන් පිරිසක් තොරතුරු අනාවරණය කරගෙන තිබේ. Zophobas morio ලෙස හැඳින්වෙන එම පණු විශේෂය පොදුවේ හඳුන්වන්නේ, සුපර්වර්ම් (superworm) යනුවෙනි. අදාළ විද්‍යාඥ කණ්ඩායම පවසන්නේ, මෙම පණු විශේෂය මඟින් ප්ලාස්ටික් ප්‍රතිචක්‍රීකරණයේ විප්ලවයක් ඇති කළ හැකි වනු ඇති බවය.

එසේම මෙම විශේෂ පණුවන් සිය පැවැත්ම සඳහා ප්ලාස්ටික් විශේෂයක් වන polystyrene ආහාරයට ගන්නා බව මූලික පර්යේෂණවලින් තහවුරු වී තිබේ. මෙම පණුවන් සතු සුවිශේෂී එන්සයිමයක් මඟින් ප්ලාස්ටික් ජීරණය වන බව එහිදී හඳුනාගෙන ඇත. පර්යේෂකයන් පෙන්වාදී ඇත්තේ, ප්‍රතිචක්‍රීකරණයේ වැදගත් සන්ධිස්ථානයක් ලෙස මෙය සැලකිය හැකි බවය.

පර්යේෂණ කණ්ඩායමේ සාමාජික ආචාර්ය ක්‍රිස් රින්ක් පවසන්නේ, “සුපර්වර්ම් නමැති පණුවා පොලිස්ටිරීන් හැපීමෙන් කැබලි බවට පත් කර ඔවුන්ගේ උදරයේ ඇති එන්සයිමයක් හරහා ජීරණය කර ගන්නා,” බවයි. ඕස්ට්‍රේලියාවේ ක්වීන්ස්ලන්ඩ් විශ්වවිද්‍යාලයේ පර්යේෂකයන් පිරිසක් මෙම පර්යේෂණය සිදු කර ඇති අතර සුපර්වර්ම් නමැති පණුවන් කාණ්ඩ තුනකට බෙදා විවිධ ආහාර වර්ග ලබා දීමෙන් පර්යේෂණය සිදු කර තිබේ. මේ අනුව, එම පණුවන් මෝටර් රථවල භාවිත වන විවිධ ප්ලාස්ටික් උපාංග පවා ආහාරයට ගන්නා බව තහවුරු වී ඇත.

කුමුදු ජයවර්ධන