මුස්ලිම් ධර්මයට ‘අපහාස කළ’ බව කියන කාන්තාවක නිසා ඉන්දීය රාජ්‍ය තාන්ත්‍රික සබඳතා අනතුරේ

0
1109

ඉන්දියාවේ පාලක පක්ෂය වන භාරතීය ජනතා පක්ෂයේ ජ්‍යෙෂ්ඨ නිලධාරීනියක විසින් මුහම්මද් නබිතුමන් පිළිබඳව ප්‍රකාශ කරන ලද ‘අපහාසාත්මක අදහසක්’ හේතුවෙන් මේ වන විට දැඩි මතභේදාත්මක තත්ත්වයක් උද්ගත වී තිබේ.

විදෙස් මාධ්‍ය වාර්තා කළේ, කුවේට්, ඉරානය, කටාර්, සෞදි අරාබිය, එක්සත් අරාබි එමීර් රාජ්‍යය, ඕමානය, ඉන්දුනීසියාව, ඉරාකය, මාලදිවයින්, ජෝර්දානය, ලිබියාව සහ බහරේන් ආදී රටවල් රැසක් මේ සම්බන්ධයෙන් විරෝධය පළ කර ඇති බව ය.

මෙම තත්ත්වය ඉන්දියාව සහ ඉහත සඳහන් රටවල් අතර රාජ්‍ය තාන්ත්‍රික සබඳතාවලට ද දැඩිව බලපා ඇතැයි වාර්තා වේ.

මෙම අදහස් පළ කිරීම පළමුවෙන් කර ඇත්තේ, භාරතීය ජනතා පක්ෂයේ ජ්‍යෙෂ්ඨ නිලධාරිනියක වූ නූපූර් ෂර්මා නමැති නීතිඥවරියකි.

ඇය එම ප්‍රකාශය සිදු කර තිබුණේ, රූපවාහිනී නාලිකාවක පැවති විවාදයකදී ය‍.

පසුව එම අපහාසාත්මක බව කියන අදහස පක්ෂයේ දිල්ලි මාධ්‍ය ඒකකයේ ප්‍රධානී නවීන් කුමාර් ජින්දාල් විසින් ෂෙයාර් කර තිබිණි.

ඔවුන් දෙදෙනා ම අදාළ තනතුරුවලින් ඉවත් කර ඇතත්, “මුස්ලිම් ආගමට සිදුවූ අපහාසය” හේතුවෙන් ඉන්දියාවට එරෙහිව මතු වෙමින් පවතින විරෝධය තවදුරට ත් පවතී.