ශාපලත් Porsche මෝටර්රථය හොලිවුඩ් සුපිරි තරුව බිලි ගනියි

0
162

1931 වර්ෂයේ පෙබරවාරි 08 වැනි දින ඉන්දියානාවල මැක්ලූර් නම් වීදියේ තිබෙන සෙවන් ගේබල්ස් මහල් නිවාසයේදී මොහු උපත ලබනවා. ඔහුගේ පියා ඇමෙරිකාවේ මුල් පදිංචිකරුවන්ගෙන් පැවැත එන පවුලක පුද්ගලයෙක්. මව ස්වදේශික ඇමෙරිකානුවෙක්.

කාලය ගත වෙද්දී ජේම්ස්ගේ පියා කුඩා ජේම්ස්ව සහ බිරියවත් රැගෙන කැලිෆෝනියාවල බ්‍රෙන්ට්වුඩ් නම් ප්‍රදේශයේ පදිංචිය සඳහා පිටත් වෙනවා. ඒ වෙනකොට පුංචි ජේම්ස්ට යාන්තමින් අවුරුදු 2ක් හෝ 3ක් පමණ ඇති. කාලය ගතවෙමින් ජේම්ස් ටික ටික උස් මහත් වෙනවා. පාසල් වයසට පැමිණෙන කොලු ගැටයෙක් වූ ජේම්ස් බ්‍රෙන්ට්වුඩ්වල තිබෙන කුඩා පාසලකට ඇතුළත් වුවත් වැඩි කාලයක් ඔහුට එහි ඉගෙනුම ලබන්න වෙන්නේ නැහැ.

මක් නිසාද ඔහුගේ පියා බ්‍රෙන්ට්වුඩ්වලින් ජේම්ස්ව ඉවත් කරගන මැකින්ලි ප්‍රාථමික පාසලට ඔහුව ඇතුළත් කළ නිසායි.
කුඩා කාලයේ සිටම ඉගෙනීමට දක්ෂතා දැක්වූ ජේම්ස් මවට ගොඩක් ආදරෙයි. ඔහු දවසේ වැඩි කාලයක් ගත කළේ ඔහුගේ මව සමඟයි. ඔහුගේ සෑම දෙයකටම සිටියේ මවයි. අවාසනාවකට මෙන් 1938 වර්ෂයේදී ජේම්ස්ගෙ මවට උදරාබාධයක් වැලඳෙනවා. මෙයින් විශාල ලෙස ජේම්ස්ගේ මව පීඩා විඳින අතර මුල් කාලයේදී එය සාමාන්‍ය ආකාරයේ උදර ආබාධයක් ලෙස පැවැතුණද වසරක් පමණ ගත වන විට විටින් විට උග්‍ර ලෙස උදරාබාධය වර්ධනය වෙන්නට පටන් ගන්නවා.

එහි අවසාන ප්‍රතිඵලය වශයෙන් බලා සිටියදී ජේම්ස්ගේ මව කෙට්ටු වෙන්න පටන් ගන්නවා. ඇයගේ ශරීර බර විශාල වශයෙන් අඩු වූ අතර අවසානයේ හමට යටින් ඇටකටු පමණක් තිබෙන්නාක් මෙන් පෙනෙන තරමට බර අඩු වී ගියා. මේ කාලය වෙනකොට ජේම්ස්ට වයස අවුරුදු 9ක් පමණ ඇති. ජේම්ස්ගේ තරුණ මව අකාලයේ මියගියා. පසුව අනාවරණය වන්නේ ඇයට ගර්භාශ පිළිකාවක් තිබූ බවයි.


කුඩා කාලයේදීම මවගේ සෙනෙහස අහිමි වූ ජේම්ස්ට ඉතිරි වුණේ ඔහුගේ පියා පමණයි. එහෙත් ජේම්ස් මවට මෙන් පියා සමඟ සමීප නැහැ. ඒ නිසා පාළුවකින් ජීවත් වූ නිසාම ඔහුගේ අධ්‍යාපන මට්ටමද යම්තාක් දුර්වල වීමට පටන් ගත්තා. මේ සියලුම දේ හේතු කරගෙන ජේම්ස්ගේ පියා තමන්ගේ සහෝදරිය හෙවත් ජේම්ස්ගේ නැන්දා සහ මාමාගේ නිවෙසෙහි ජේම්ස්ව නවත්තන්න තීරණය කරනවා.

ඉන්ඩියානාවල ෆෙයාමවුන්ට්හි අක්කර ගණනක ගොවි බිමක් ජේම්ස්ගේ නැන්දට සහ මාමාට හිමිව තිබුණා. කොහොමත් ජේම්ස්ගේ පියාගේ පවුල පාරම්පරික ගොවියන් වන හෙයින් පවුලේ ගොඩක් අයට ගොවිපොළවල් තිබුණේ. ඉතින් ඔහොම කාලයක් නැන්දා සහ මාමා ළඟ ජේම්ස් වැඩෙන අතර දෙවැනි ලෝක සංග්‍රාමය ආරම්භ වූ නිසා ජේම්ස්ගේ පියා ඇමෙරිකානු හමුදාවට එක් වී යුද්ධ කළ අතර යුද්ධයෙන් පසුව නැවත වාරයක් විවාහ වෙනවා.

ඒ වෙනකොට ජේම්ස් හැඩි දැඩි තරුණයෙක් වී සිටියා. මවුපිය සෙනෙහස දෙකම ඔහුට ලැබුණෙත් මාමා සහ නැන්දාගෙන් නිසා ජේම්ස් පියා ළඟට යෑමට වැඩි කැමැත්තක් දැක්වූවේ නැහැ. පාසල් කාලයේ අවසානයේ සිට ජේම්ස් පල්ලියේ පූජකවරයා සමඟ ලොකු සබඳතාවක් ඇති කරගන්නවා.
පල්ලියෙ වැඩවලට උදවු වීමටද ජේම්ස් කිසිම පැකිළීමකින් තොරව යන අතර පූජකවරයාද ජේම්ස්ගේ ඉගෙනීමට උදවු කළා. පාසල් කාලයෙන් පසුව පල්ලියේ පූජකවරයා ජේම්ස්ට අපූරු අවස්ථාවක් ලබා දෙනවා. ඒ ගොන් පොර තරගයකට සහභාගි වීමයි.

මෙතැනින් පසුව ජේම්ස්ට රේස් කාර් පැදවීමටද උනන්දු කරවන අතර තරගවලටද ජේම්ස්ව සහභාගි කරලා යම් ජනප්‍රියත්වයක් ලබා දීමට කටයුතු කළ බවට සඳහන් වෙනවා. කාර් රේස්වලින් පසුව ඔහුගේ ජීවිතයේ හැරවුම් ලක්ෂ්‍යය වූ කලා ක්ෂේත්‍රයට පිවිසීමත් සිදුවන්නේ පල්ලියේ පූජකවරයාගේ මාර්ගයෙනුයි.

මේ දේවල් සිදුවන විට ජේම්ස්ට වයස අවුරුදු 19ක් පමණ ඇති.1950 වර්ෂයේදී ජේම්ස් ඩීන් ඔහුගේ පළමු රඟදැක්වීමට ඉදිරිපත් වෙනවා. මේක චිත්‍රපටයක් නම් නෙවෙයි. Pepsi Cola රූපවාහිනි දැන්වීමක්. ඉතින් ඔය විදිහට තමන්ගේ පළමු රූපවාහිනි තිරයේ පෙනී සිටීමෙන් පසුව මෙයා ඔය වගේ පොඩි පොඩි දැන්වීම්වලට පෙනී සිටියත් ජීවිතේ ප්‍රධානම තැනක් දුන්නේ කාර් රේස්වලටයි. ඉතින් කාලය ඔය විධියට ගෙවී යන විට 1953 වර්ෂයේදී ජේම්ස් ඩීන්ට East of Eden නම් චිත්‍රපටයේ ප්‍රධාන චරිතයට රඟපාන්න චිත්‍රපට නිෂ්පාදකවරයෙක් ඇරැයුම් කරනවා.


චිත්‍රපටයක පෙනී සිටීම ජේම්ස්ගේ ලොකු ආසාවක් වූ නිසා මේ චිත්‍රපටයට තමන්ගේ උපරිම දක්ෂතාව යොදලා රඟපෑ “East of Eden” චිත්‍රපටය 1955 වර්ෂයේදී සිනමාහල්වල තිරගත කිරීම් ආරම්භ කරනවා. මේ චිත්‍රපටය ඒ කාලයේ අතිශය ජනප්‍රිය වූ චිත්‍රපටයක්. පෙම් සබඳතාවක් ගැන දිගහැරුණු මේ චිත්‍රපටය නිසා ජේම්ස් ඩීන් ලොකු කාන්තා ආකර්ෂණයක් දිනාගත් බවට ඉතිහාසය සාක්ෂි දරනවා. එමෙන්ම ඩොලර් මිලියන 5ක බොක්ස් ඔෆිස් වාර්තාවක් පවා තබන්න ජේම්ස් ඩීන්ගෙ පළමු චිත්‍රපටය සමත් වෙනවා.


ඉතින් ඔය විදිහට සුළු කාලයක් ඇතුළත ප්‍රධාන චරිත රඟපාපු චිත්‍රපට 3ම බොක්ස් ඔෆිස් මට්ටමට ගේන්න ජේම්ස්ගේ රඟපෑමට සහ ඔහුගේ පෙනුමට හැකියාව ලැබෙනවා. ඉතින් මේ හොලිවුඩ් සුපිරි තරුවට දවසක් තමන්ගේ මාරයා මුණගැසෙනවා. ඒ Porsche වර්ගයේ 550 Spyder මාදිලියෙ කාර් එකක්. මේ කාර් එකේ පෙනුම ඉතාමත් හුරුබුහුටියි. ඒ වගෙම එය සැහැල්ලුවන් පදින්න පුළුවන් කාර් එකක්. ජේම්ස් මේ කාර් රථය ගෙදර ගෙනැල්ලා අඩුපාඩු හදලා තීන්ත ගාලා කාර් එකේ 130 ඉලක්කම එහෙම ගහලා ලස්සනට හදලා ගන්නවා.


ජේම්ස් මේ කාර් රථයෙන් තරගවලට පවා සහභාගි වූ අතර තමන්ට වාසනාව ගෙනැල්ලා දෙන කාර් රථයක් බවට මේ 550 Spyder රථය පත් වුණා.
ඒ නිසාම ජේම්ස්ගේ කාර් එකතුවෙන් මේ කාර් එකට ලොකු තැනක් හිමි වුණා වගේම ජේම්ස්ගේ ආසම කාර් එක වුණෙත් මේ 550 ඵනරඤඥප රථයයි. මේ කාර් එකට ජේම්ස් ආස කළ නිසාම Little Bastard කියලා නමකුත් දාන්න ජේම්ස් ඩීන් තීරණය කරනවා.


ඒත් මේ කාර් එක ජේම්ස්ට කොච්චර වාසනාව ගෙනාවත් ජේම්ස් කොයිතරම් ආදරය කළත් හොඳින් බලා කියාගත්තත් ජේම්ස්ගේ මිතුරන් එහෙම මේ කාර් එකට ගොඩක් බයෙනුයි සිටියේ.
1956 වර්ෂයේදි ජේම්ස්ගේ 3 වැනි බොක්ස් ඔෆිස් චිත්‍රපටය වන Giant චිත්‍රපටය නිකුත් වීමට පෙර, ඒ කියන්නේ 1955 වර්ෂයේදී චිත්‍රපටයේ වැඩ නිම කිරීමෙන් පසුව සතුට සැමරීම සඳහා නිෂ්පාදකවරු, අධ්‍යක්ෂවරු, නළු නිළියො, පොඩි සාදයක් පැවැත්වුවා. ඉතින් චිත්‍රපටය තිරගත වෙන්නත් කලින් කට්ටිය මෙහෙම මුණගැහුණේ අනිවාර්යයෙන්ම මේ චිත්‍රපටයත් බොක්ස් ඔෆිස් එකක් වෙනවා කියල දන්න නිසාමයි. ඉතින් ජේම්ස් මේ සාදයට පැමිණෙන්නේ ඔහුගේ ප්‍රියතම රථය වන Little Bastard කාර් එකෙනුයි.


සාදයේ හොඳට විනෝද වෙලා සාදය අවසාන වෙන්න මොහොතකට කලින් සාදයට සහභාගි වූ තරුණ නිළි උ(ර්)ශුලා ඇන්ඩ්‍රස්ව නිවෙස වෙතට ගෙනයන බවට ජේම්ස් ඩීන් පොරොන්දු වූ නිසා සාදය නිමා වූ පසු ඇන්ඩ්‍රස් සහ ජේම්ස් ඩීන් කාර් රථයට ගොඩවෙනවා. ඉතින් ඇන්ඩ්‍රස් කාර් එක අෑතට දකිද්දි ආසාවෙන් ළඟට ආවත් කාර් එකට නැඟපු වෙලාවේ සිටම ටිකක් බයෙන් තමා හිටියේ.

කොහොම හරි කාර් එකෙන් ඇන්ඩ්‍රස්ව නිවෙස ළඟින් බැස්සුවයින් පස්සෙ ජේම්ස්ගෙන් සමු ගැනීමක්වත් නොකර ක්ෂණිකව නිවෙසෙ ප්‍රධාන ‍ෙදාර වෙත දිව ගිය ඇන්ඩ්‍රා ඇතුළට ගිහින් එක වරම ‍ෙදාර වහගන්නවා. ජේම්ස් මේ සිද්ධිය වැඩිය ලොකුවට හිතන්න ගියේ නැහැ.


ඉතින් මේ අද්භූත බියක් ගෙන දෙන කාර් එකට බය වුණු එකම කෙනා උර්ශුලා ඇන්ඩ්‍රස් නෙමෙයි. star Wars චිත්‍රපට මාලාවේ Obi-Wan Kenobi රඟපෑ Hollywoodවල තරුවක් වන ඇලෙක් ගිනස් පවා මේ කාර් එකේ ගිහින් තියෙනවා. දවසක් ජේම්ස් සමඟ ඇලෙක්ස් ගිනස් කාර් එකට නැඟලා දෙන්නත් එක්ක කතා බහ කරමින් ගමන්ගෙන තියෙනවා. ඉතින් කාර් එකෙන් බැහැල යනකොට ඇලෙක් ගිනස් ජේම්ස් ඩීන් වෙත අවවාද කරනව සතියක් දෙකක් යනකම් කාර් රේස් නොයා ඉන්න ලෙසට.


ඒත් ඔහු ඒ දේවල් වැඩිය ගනන් ගන්නෙ නැහැ. මොකද ජේම්ස් ඩීන් කියන්නේ කාර් රේස් අද ඊයෙ පදින්න පටන් ගත්ත අයෙක් නොවේ. ඇලෙක් ගිනස්ගේ කීම අහන්නැතිව ඊට දින කීපයකට පසු, එනම් 1955 වර්ෂයේ සැප්තැම්බර් මාසයෙ 30 වැනි දින ඉදිරියට යෙදී තිබූ තරගයක පෙර පුහුණුවක් වශයෙන් ජේම්ස් මහ පාරෙ කාර් එක වේගයෙන් ධාවනය කරලා තියෙනවා. ඒත් ටික දුරක් යනවිට අධික වේගයෙන් මහ මාර්ගයේ ධාවනය කළ වරදට ජේම්ස්ව පොලිසියෙන් අල්ලගන්නවා.


ඒත් කිසිම දඩ මුදලක් අය කරන්නෙ නැහැ. හේතුව පොලිස් නිලධාරියාත් ජේම්ස්ගෙ ලොකු රසිකයෙක්. මහමාර්ගවල වේගයෙන් නොයන ලෙසට ඔහුත් අවවාද කරල යන්න ඉඩ හැරියත් ජේම්ස් ඒ දේවල් ගනන් නොගෙන තමන්ගෙ වේගය එලෙසම පවත්වාගනිමින් ධාවනය කළ අතර විශාල රිය අනතුරකට මුහුණ දීලා ඔහු අකාලයෙ මියයනවා. එවිට ඔහුගෙ වයස අවුරුදු 24යි.
රිය අනතුරෙන් පසුව ජේම්ස්ගෙ අවසන් කටයුතු සිදුකළාට පස්සෙ අනතුරට ලක් වූ කාර් රථය පොලිස් භාරයට ගන්නවා.

කාර් එක නැවත භාවිතයට ගත නොහැකි තත්ත්වයකට පත් වී තිබූ නිසා භාවිතයට ගැනීමට හැකි කොටස් ගලවා වෙන්දේසි කරන්න දානවා. මේ වෙන්දේසියට සහභාගි වූ කාර් රේස් පදින දෙන්නෙක් ජේම්ස් ඩීන්ගෙ Little Bastard කාර් එකෙ කොටස් කිහිපයක් තමන්ගෙ කාර් රථවලට සවි කරගැනීම සඳහා මිලට ගන්නවා. ඉතින් මේ දෙන්නට දෙන්නා අ¾දුරන අය නම් නෙවෙයි. වෙන වෙනම වෙන්දේසියට එකතු වූ දෙදෙනෙක්. එහෙත් දෙන්නට දෙන්න හඳුනන්නෙ නැති වුණත් ඊළඟට සිද්ධ වෙන්න යන දේ නම් මේ දෙන්නටම අදාළයි.


මේ දෙන්නම කාර් රේස් පදින අය නිසා මේ දෙන්නම නොදැනුවත්ව එකම තරගයක තරග වැදීමට නියමිතවයි තිබුණෙ. මේ අයගෙ තරගය ළඟ ළඟම එන නිසා ඔවුන් පෙර පුහුණුවීම් ඇතිව තරගයට සහභාගි වුණත්් මේ තරගය අතරතුර තරගකරුවන් දෙදෙනකුගෙ කාර් රථ ගැටීමෙන් විශාල අනතුරක් ඇති වෙනවා. මේකෙන් එක් තරගකරුවකුට ජීවිතය පවා අහිමි වූ අතර ඒ දිවි අහිමි වූ තරගකරුවා වෙන කවුරුත් නෙවෙයි එදා වෙන්දේසියෙදි ජේම්ස් ඩීන්ගෙ කාර් එකෙ කොටස් මිලට ගත් දෙදෙනාගෙන් කෙනෙක්. වාසනාවකට මෙන් කාර් එකේ කොටස් මිලට ගත් අනෙක් කෙනා බේරෙනවා.

ඒ වාහන ගැටීමෙන් බේරුණු අනිත් කෙනා කියන විධියට ඔහු ජේම්ස් ඩීන්ගෙ කාර් එකේ කොටස් සවි කරගත් දා ඉඳන් කාර් එකට නඟින සෑම විටදීම ලොකු මානසික පීඩනයක් පසුතැවීමක් වගේ සිතිවිලි හේතුවක් නැතුවම දැනෙන්න ගන්නවලු. ඒ වගේම සමහර වෙලාවට අඬන ශබ්ද වගෙ දේවලුත් කාර් එකෙ ඉන්න වෙලාවට ඔහුට ඇහිල තියෙනවා.


මේ කතාව සම්බන්ධව ටිකක් ප්‍රචාරය වෙනකොට මෙතෙක් නිශ්ශබ්දව සිටි උර්ශුලා ඇන්ඩ්‍රස් පවා තමන්ගෙ අතීත සිදුවීම මතක් කරනවා. ඇයටත් එදා කාර් එකෙ ඉන්නකොට පාළුවක්, තනිකමක් සහ පීඩනයක් දැනුණා වගේම කවුරුන් හෝ කාර් එකෙන් බහින ලෙසට තර්ජනය කළා කියලා ඇය ප්‍රකාශ කරනවා. ඉතින් මේ දේවල් ජේම්ස් ඩීන්ට නම් නොදැනෙන්න ඇතැයි විශ්වාස කරන්නට වෙනවා. මොකද ඔහුගෙ ප්‍රියතම කාර් එක මේ Porsche 550 Spyder රථය.


ඒ වගෙම ජේම්ස් ඩීන් සමඟ ඹ්ඪබබතඥ ඕචඵබඥපඤ කාර් එකේ ගමන් කළ අනෙක් පුද්ගලයා වන ඇලෙක් ගිනස්ද ඇන්ඩ්‍රස් වගේම ඔහුගෙ අතීතය ගැනත් මිතුරන් සමඟ බෙදා ගන්නවා. “මම ජේම්ස්ගෙ කාර් එකේ ගියපු දවසෙ තව සතියකින් මේ කාර් එකේ අයිතිකාරයා මැරිලා යනවා කියලා කට හඬක් ඇහුණා. එවලේ මං ගොඩක් බය වුණු නිසා ජේම්ස්ට මේ ගැන ඇඟෙව්වා. එත් මට ඇහුණ දේවල් ඇත්තක් කියල මන් හිතුවෙ නෑ කියලා කියනවා.


ඉතින් මේ කතා ඔවුන්ට දැනුණු දේවල්ද නැතිනම් ඇත්තටම කාර් එකට මොකක් හෝ ආත්මයක් ආවේශ වෙලාද ශාපයක් කරලද කියන එක නම් හරියටම දන්නෙ කාර් එකේ ජේම්ස් ඩීන්ට කලින් හිටපු අයිතිකරුවන්ගෙන් කෙනෙක් තමා. ඉතින් මේ ආකාරයට අද්භූත කතා මධ්‍යයේ පොලිසිය තීරණය කරනවා ජේම්ස් ඩීන්ගෙ කාර් එකේ ඉතුරු වූ කොටස් සියල්ලම ගබඩා කාමරයක අහුරලා තබන්න. ඉතින් මේ කොටස් අහුරලා තිබුණේ විශාල ගබඩා කාමරයක කුඩා පෙට්ටියක් ඇතුළෙයි. මේ ගබඩාවෙ තරමක් වටිනා කියන දේවල් තිබූ නිසා දවසක් ගබඩාවට හොරු කිහිප දෙනෙක් පැනලා ගන්න පුළුවන් දේවල් හොරකම් කරගෙන යනවා.

හොරකම් කරපු දේවල්වලට ජේම්ස්ගෙ කාර් එකේ කොටස් ටිකත් ඇතුළත්.
මේ අය හොරකම් කරපු දේවල් විවිධ පුද්ගලයන්ට ලාබෙට විකුණලා සල්ලි හොයාගන්නවා. මේ සිදුවීමෙන් වසරකට අඩු කාලයක් තුළදී සිදුවන රිය අනතුරු කිහිපයකම 550 Spyder කාර් එකේ අමතර කොටස් තිබූ බවට හොයාගත්තට පස්සෙ මේ කාර් එක සමඟ තිබෙන අද්භූත කතා එන්න එන්න වැඩි වෙන්න ගන්නවා. මේවායින් බොහොමයක් කට කතා වුවත් අනතුරු කිහිපයකටම මුහුණ දුන් වාහනවල ජේම්ස්ගෙ කාර් මාදිලියෙ කොටස් තිබිලා හොයා ගන්නවා.


ආපහු පාරක් අනතුරට ලක් වූ වාහනවල කොටස් ටික ගෙනැවිත් ගබඩාවක ගබඩා කරලා තිබුණත් හදිසි ගින්නක් නිසා ගබඩාවෙ බඩු බොහොමයක් විනාශ වුණත් කාර් අමතර කොටස් වැනි දේවල් ඉතුරු වී තිබුණා. ඉතින් මේ ඉතුරු වූ බඩු භාණ්ඩ අතර අර වාහනවලින් ගෙනාපු කොටස් එක්ක ජේම්ස් ඩීන්ගෙ වාහනයෙ කොටස් කිහිපයකුත් තිබිලා තියෙනවා.

අවසානයේ බලධාරීන් මේ ගින්නෙන් ඉතුරු වූ කොටස් වෙනත් ගබඩාවකට රැගෙන යෑමට ලොරියකට පටවන අතර ලොරිය අනෙක් ගබඩාව වෙත යන අතරවාරයෙදි අවාසනාවන්ත ලෙස අනතුරකට මුහුණ දුන් අතර ලොරියෙ රියැදුරු මහතා අනතුර හේතුවෙන් මියයනවා. ඒ එක්කම ලොරියෙ රැගෙන ගිය බොහොමයක් භාණ්ඩ සහ වාහන කොටස් අතුරුදන් වී ගිය නිසා එතැන් පසුව ජේම්ස් ඩීන්ගෙ Little Bastard කාර් එක ගැන තිබූ අද්භූත කතා අවසන් වෙලා යනවා.


ඇත්තෙන්ම මේ කාර් රථය සම්බන්ධව ගෙතී තිබෙන මෙවැනි කතා නිසා අදටත් ජේම්ස් ඩීන් සහ ඔහුගෙ කාර් එක නොවිසඳුණු අබිරහසක් බවට පත් වී තිබෙන අතර සමහරෙක් නම් මේ කතා අහඹු සිදුවීම් විධියට විශ්වාස කරමින් බැහැර කරනවා. ඒත් ඇත්තටම ජේම්ස් ඩීන්ගෙ කාර් එක සමඟ යම් ආත්මයක් බැඳී තිබුණාද නැතිනම් ශාපයක් තිබුණාද කියන එක ගැන නම් පැහැදිලි කිරීමට අපහසුයි. මක් නිසාද හොල්මන් සහ මායා කර්ම ගැන 100‍%ක් විශ්වාස කළ හැකි සාධක නොමැත. ඒ නිසා නොවිසඳුණු අබිරහසක් යනුවෙන් මෙවැනි කතාවලට නම් තැබිය හැකියි.
ධනංජය මධුෂාන්