ඇමැති සැප නැතිවේ යැයි භයෙන් සමහරුන් ආණ්ඩුවෙන් ඉවත් වෙන්නේ නැහැ

  👤  3570 readers have read this article !
By mawbima 2017-12-15

රනිල් වික්‍රමසිංහගේ දෙපා මුල වැඳ වැටෙමින් ඇමැති කටු සූප්පු කරන ශ්‍රී ලංකා නිදහස් පක්ෂයේ ඇතැම් ඇමැතිවරුන්ට වුවමනා වී ඇත්තේ පක්ෂය විනාශ කිරීමේ පාපකර්මයට ඒකාබද්ධ විපක්ෂයත් හවුල් කර ගැනීමට බව ඒකාබද්ධ විපක්ෂයේ කැඳවුම්කරු, ගම්පහ දිස්ත්‍රික් පාර්ලිමේන්තු මන්ත්‍රි ප්‍රසන්න රණතුංග ප්‍රකාශ කළේය.
ශ්‍රී ලංකා නිදහස් පක්ෂයේ සමඟිය බිඳ වැටුණේ ඇමැති සැප නැතිවෙතැයි බියෙන් ආණ්ඩුවෙන් ඉවත් නොවූ අය නිසා බව පැවැසූ රණතුංග මහතා ඇමැති වරප්‍රසාද වෙනුවෙන් ඕනෑම පාවාදීමක් කිරීමට සූදානම් මොවුන් ළං කර ගතහොත් ඒකාබද්ධ විපක්ෂයත් විනාශ වනු නිසැක බවත් කීවේය.

මන්ත්‍රිවරයා මේ අදහස් පළ කෙළේ ශ්‍රී ලංකා පොදු ජන පෙරමුණ වෙනුවෙන් නාමයෝජනා භාරදීමට ගම්පහ දිස්ත්‍රික් ලේකම් කාර්යාලය වෙත ඊයේ (14දා) පැමිණි අවස්ථාවේදීය.
ශ්‍රී ලංකා නිදහස් පක්ෂයේ සමඟියට බාධා කරන්නේ ප්‍රසන්න රණතුංග සහ නාමල් රාජපක්ෂ යන මන්ත්‍රිවරුන් බවට දයාසිරි ජයසේකර ඇමැතිවරයා කර ඇති ප්‍රකාශය සම්බන්ධයෙන් මාධ්‍යවේදීන් නැඟූ ප්‍රශ්නවලට පිළිතුරු වශයෙන් රණතුංග මහතා මෙසේද පැවැසීය.

ශ්‍රී ලංකා නිදහස් පක්ෂයේ සමඟියට බාධා කරන්නේ මම කියලා කවුරු හරි චෝදනා කරනවා නම් ඒ කියන කෙනා ඔරිජිනල් ශ්‍රී ලංකාකාරයෙක් වෙන්න එපැයි. අපේ පක්ෂයේ ඉඳලා යූ.ඇන්.පී.යට ගිහින් එතැනින් ඇමැතිකමක් නැති තැන අපේ පැත්තට ඇවිල්ලා, ආයෙමත් මහින්ද මහත්තයා ගාව ඉඳලා මෛත්‍රිපාල මහත්තයා ගාවට ගිය කෙනෙක්ට එහෙම කියන්න අයිතියක් නැහැ.

දයාසිරි ඇමැතිවරයා හැමදාම කළේ පක්ෂ සහ පැත්ත මාරු කරමින් තමන්ගේ වාසිය සලසා ගන්න එක. එතුමාට දෙන ඇමැතිකම හරියට කරගන්න බැරි වුණාට පැත්ත මාරු කරන එක නම් හොඳට කරන්න පුළුවන්. අද නිදහස් පක්ෂයේ සමඟිය ගැන ලොකු උනන්දුවක් ඇති වෙලා තියෙන්නේ අපේ පැත්තට උඩින් පාත්වෙච්ච පැරෂුට්කාරයන්ට තමයි.
අපිට මතකයි එතුමා ඉස්සර එක්සත් ජාතික පක්ෂයේ ඉන්න කාලේ මහින්ද මහත්තයා විවේචනය කරමින් හම්බන්තොට වරායට කියලු දේවල්. ඒක පොකුණක් කිව්වා. ඒකේ ගලක් තියෙනවා කිව්වා. ලොකු නැව්වලට එන්න බැහැ කිව්වා. අන්තිමට මොකද වුණේ? මහින්ද මහත්තයාගේ කකුල් අල්ලලා වැඳලා සමාව අරන් අපේ පැත්තට එකතු වුණා.
එකතු වෙලා කියනවා හම්බන්තොට වරාය හොඳ ව්‍යාපෘතියක්ලු. ඒ වගේ කෙනෙක් කියන කතා අපි වැඩිය ගණන් ගතයුතු නැහැ. කොහොමටත් ඔය කෑගහන අයියලාගේ දේශපාලනය ලබන මහ ඡන්දයෙන් පස්සේ ඉවරයි. මේ පාරත් පාර්ලිමේන්තුවට රිංගා ගත්තේ මහින්ද මහත්තයාගේ ෆොටෝ එක දාලා පෝස්ටර් ගහපු නිසයි.
අපි නිදහස් පක්ෂයේ සමඟියට බාධා කළේ නැහැ. අපි කිව්වේ අපිත් එක්ක එකතු වෙනවා නම් ඇමැතිකම් අතහැරලා ආණ්ඩුවෙන් ඉවත් වෙලා එන්න කියලයි. ආණ්ඩුවෙන් ඉවත් නොවී සන්ධානගත වෙන්න බැහැ කියලයි අපි කිව්වේ. ඒ වගේ රෑ ඩැනියෙල් දවල් මිගෙල් ගේම් ගහන්න එන්න එපා කියලයි අපි එතුමන්ට කිව්වේ.

එයාලා කරන්නේ ඇමැතිකමෙන් අයින් නොවී ඡන්දවලින් තමන්ගේ හෙංචයියෝ ටික ප්‍රාදේශීය සභාවට පත්කර ගන්න උත්සාහ කරපු එකයි. දයාසිරි ඇමැතිවරයාට වුණත් හිතෙනවා ඇති පඬුවස්නුවර ප්‍රාදේශීය සභාවට එකම මන්ත්‍රි කෙනෙක්වත් පත් කරගන්න බැරි වෙයි කියලා. එතුමට එහෙම බය හිතෙන එක සාධාරණයි.
හැබැයි අපි කියන්නේ සමඟියට බාධා කළේ අපි නෙවෙයි. ඇමැති කටුවලට ලොල් වෙලා රනිල් වික්‍රමසිංහ මහත්තයාගේ කකුල් ළඟ වැඳ වැටුණ අය තමයි සමඟිය විනාශ කළේ. ඒ අය තමයි පක්ෂය විනාශ කළේ. එයාලට දැන් ඕනේ පක්ෂය විනාශ කරපු පාපකර්මයට අපිවත් හවුල් කරගන්නයි. ඒවට අපි ඉඩ තියන්නේ නැහැ.

මිනුවන්ගොඩ - අතුකෝරල
වේයන්ගොඩ - ඉන්දික තුෂාර

අද මව්‍බිමෙන්

තවදුරටත්

මව්බිම දැන්

තවදුරටත්

අද පුවත්පත

අද කාටූනය

mawbima Cartoon