ඉන්දීය පිලේ පුහුණුවීම්වලදී තුවාල ලැබූ රාගම පන්දු යවන්නාගේ වියදම් දරන්න ෂර්මාත් එයි

  👤  3347 readers have read this article !
By mawbima 2018-03-16

විචිත්‍ර වීරසිංහ

පසුගිය වසරේ දෙසැම්බර් මාසයේදී ශ්‍රී ලංකා කණ්ඩායම ඉන්දියාවේ කළ සංචාරයේදී ශ්‍රී ලංකා කණ්ඩායම දිරිමත් කිරීමට ගයාන් මංජුල සමඟ ඉන්දියාවට ගොස් සිටි නිලාම්ගේ පියා අසනීප වුණ බව දැනගත් ඉන්දීය නායක රෝහිත් ෂර්මා වහාම නිලාම්ට ආපසු ලංකාවට ඒම සඳහා ගුවන් ටිකට් පතක් වෙන්කරදී තිබූ අතර, එම සිදුවීම අමතක වී ගොස් නොමැති ඉන්දීය නායකයා මේ දිනවල පැවැත්වෙන නිදහස් කුසලාන තරගාවලිය අතරතුරදී නිලාම්ගේ පියාගේ සුවදුක් විමසා බැලීම සඳහා ඔහුව බැලීම සඳහා යෑමට සූදානම් වී ඇතැයි පැවැසේ.

ඒ අනුව අද හෝ හෙට දිනයේදී ඉන්දීය නායකයා නිලාම්ගේ පියාගේ සුවදුක් විමසා බැලීම සඳහා නිලාම්ගේ නිවසට යෑමට නියමිතව ඇති අතර, මේ සම්බන්ධයෙන් ශ්‍රී ලංකා කණ්ඩායමේ දිරිමත් කරන්නකු වන ගයාන් කුමාර "මව්බිම"ට පැවැසුවේ මෙවැන්නකි. "මට රෝහිත් ෂර්මා හමු වුණාම හුඟක් වෙලාවක් අපි කතා කළා. ඒ කතා කළ වෙලාවේදී ඔහු මගෙන් ඇහුවා නිලාම්ගේ තාත්තගේ විස්තර. ඒ අහපු වෙලාවෙදී ඔහු අපිට කිව්වා 16 හෝ 17 වැනිදා නිලාම්ගේ තාත්තා බලන්න එන්නම් කියලා"
මේ අතර ඉන්දීය කණ්ඩායමට දැල් ආවරණ පුහුණුවීම් සඳහා පන්දු යවමින් සිටි රාගම ක්‍රීඩා සමාජයේ ක්‍රීඩකයකුගේ මුහුණේ පන්දුව වැදීම හේතුවෙන් මේ වනවිට නවලෝක රෝහලේ ප්‍රතිකාර ලබන එම ක්‍රීඩකයාට වැයවෙන මුදල ගෙවීමට තමන් සූදානම් බව ඉන්දීය නායකයා පවසා ඇතැයි දැනගන්නට ඇත.

දැනගන්නට ඇති පරිදි ශ්‍රී ලංකාව සමඟ පැවැති පළමු තරගයට පෙර (මාර්තු 05) මෙම සිදුවීමට මැදිවූ ක්‍රීඩකයා විසින් ඉන්දීය පිතිකරුවකුට පන්දු යවමින් සිටියදී එම පිතිකරුවා එල්ල කළ ඩ්‍රයිව් පහරක් පන්දු යැවූ රාගම ක්‍රීඩකයාගේ මුහුණේ වැදී තිබූ අතර, ලේ ගලමින් සිටි ඔහු පසුව නවලෝක රෝහලට ඇතුළත් කිරීමට පියවර ගෙන තිබිණි.

කෙසේ වෙතත් මොහුගේ සම්පූර්ණ වියදම දැරීමට ඉන්දීය ක්‍රිකට් බලධාරීන් ඉදිරිපත්ව ඇති නමුත් ඉන්දීය නායකයා පවසා ඇත්තේ අවශ්‍ය වන ඕනෑම මොහොතක මෙම ක්‍රීඩකයා වෙනුවෙන් ඕනෑම වියදමක් දැරීමට තමන්ද සූදානම්ව ඇති බවය.

අද මව්‍බිමෙන්

තවදුරටත්

මව්බිම දැන්

තවදුරටත්

අද පුවත්පත

අද කාටූනය

mawbima Cartoon