තැපැල් දුම්රියේ කාන්තාවක ගැටී මිය යෑමෙන් කුපිත වූ පිරිසක් දුම්රියට ගල් ප්‍රහාරයක් එල්ල කිරීමට විරෝධය පළකරමින් ත්‍රි’මලේ දුම්රිය රියැදුරු වැඩ වැරුමක්

  👤  3527 readers have read this article !
By mawbima 2018-02-22

ත්‍රිකුණාමලය - ලක්මාල් කේ. බදුගේ

ත්‍රිකුණාමලයේ සිට කොළඹ බලා ධාවනය වූ රාත්‍රි තැපැල් දුම්රියේ කාන්තාවක් ගැටී මිය යෑමේ සිද්ධියට කෝප වූ පිරිසක් දුම්රියට ගල් ප්‍රහාරයක් එල්ල කිරීමට විරෝධය පළ කර ඊයේ (21දා) පෙරවරුවේ සිට ත්‍රිකුණාමලය දුම්රිය රියැදුරන් වැඩ වර්ජනයක් ක්‍රියාත්මක කර තිබේ.

මේ වර්ජනය හේතුවෙන් ත්‍රිකුණාමලයේ සිට ගල්ඔය දක්වා දුම්රිය ධාවනය මුළුමනින්ම ඇනහිට තිබේ. ත්‍රිකුණාමලය දුම්රිය ස්ථානයෙන් කොළඹ කොටුව බලා මගීන් රැගෙන ගල්ඔය මංසන්ධියට ඊයේ (21දා) පෙරවරුවේ ධාවනය වීමට තිබූ දුම්රිය මේ හේතුවෙන් අවලංගු කිරීමට දුම්රිය බලධාරීන්ට සිදුවිය.
වැඩ වර්ජනය ක්‍රියාත්මක කළ ලොකෝමෝටිව් ඔපරේෂන් ඉන්ජිනියරින් දුම්රිය රියැදුරු සංගමයේ ප්‍රධාන ලේකම් ඉන්දික ‍ෙදාඩම්ගොඩ මහතා පැවැසුවේ දුම්රිය එන්ජිමට හා දුම්රිය මැදිරිවලට හානි කළ සැකකරුවන් අත්අඩංගුවට ගන්නා තෙක් මේ වර්ජනය අඛණ්ඩවම ක්‍රියාත්මක කරන බවත් සැකකරුවන් අත්අඩංගුවට ගැනීමට අපොහොසත් වුවහොත් දීප ව්‍යාප්ත වැඩ වර්ජනයක් ක්‍රියාත්මක කිරීමට විධායක සභාව සමඟ සාකච්ඡා කරන බවද පැවැසීය.

ත්‍රිකුණාමලය දුම්රිය ස්ථානයෙන් ගමන් ආරම්භ කරන සියලු දුම්රිය මැදිරි ඊයේ පෙරවරුවේ සිට එම දුම්රිය ස්ථානයේ ගාල් කර තිබේ. මේ හේතුව නිසා චීන වරාය, තඹලගමුව, මොල්ලිපොතාන, ගංතලාව, කන්තලේ හා අග්බෝපුර යන දුම්රිය ස්ථානවල දෛනික කටයුතුද ඇනහිට තිබේ.
කුපිත වූ පිරිස් අනතුරෙන් පසුව යළි ධාවනය වූ දුම්රිය නවතා කඩු පොලු රැගෙන එන්ජිමේ රියැදුරු කුටියට නැඟ හානි කර ඇති අතර තවත් පිරිසක් මාර්ගය දෙපස සිට ගල්වලින් පහරදී ඇතැයි දුම්රිය ආරක්ෂක හමුදාවේ ත්‍රිකුණාමලය කාර්ය භාර නිලධාරි ඒ.බී. ක්‍රිෂාන්ත උදය කුමාර ද සිල්වා මහතා පැවැසීය.

දුම්රියට පහර දෙන අවස්ථාවේ වහා ක්‍රියාත්මක වූ රියැදුරු පහර දීමෙන් බේරීමට පහත් වී දුම්රිය ඉදිරියට ධාවනය කර ඇති අතර එම අවස්ථාවේ දුම්රිය මාර්ගයට යතුරුපැදියක් දමා දුම්රියේ ගමන අවහිර කිරීමට පහර දුන් පිරිස් කටයුතු කර තිබේ. එය නොදුටු රියැදුරු නොනවත්වා දුම්රිය ඉදිරියට ධාවනය කිරීම හේතුවෙන් දුම්රිය මාර්ගයේ තිබූ යතුරුපැදිය කිලෝමීටරයක පමණ දුරක් ඇදී ගොස් තිබූ අතර දුම්රිය රියැදුරු හානියට හා පහරදීමට ලක්වූ දුම්රිය චීන වරාය දුම්රිය ස්ථානය දක්වා ධාවනය කර තිබිණි.

සිද්ධිය සම්බන්ධයෙන් වහා ක්‍රියාත්මක වූ පොලිසිය අවට පොලිස් ස්ථානවලින් අතිරේක පිරිස් කැ¼දවා ත්‍රිකුණාමලය සිට චීන වරාය දක්වා දුම්රිය මාර්ගයට ආරක්ෂාව යෙදවීය. අනතුරුව අතිරේක දුම්රිය එන්ජිමක් ත්‍රිකුණාමලය දුම්රිය ස්ථානයෙන් ගෙන්වා පැය තුනකට පසුව දුම්රිය ධාවනය කළ අතර හානියට පත් එන්ජිම පොලිස් ආරක්ෂාව මධ්‍යයේ පරීක්ෂණ කටයුතු සඳහා ත්‍රිකුණාමලය දුම්රිය ස්ථානයට රැගෙන ගොස් තිබිණි.

මේ අනතුරින් මිය ගියේ ත්‍රිකුණාමලය පලයුත්තු දුම්රිය නිල නිවාසවල පදිංචි පාතිමා නෆ්ලීම් නමැති විසි එක් හැවිරිදි එක් දරු මවකි. පවුල් ආරවුලක් මත මේ කාන්තාව දුම්රියට පැන සිය දිවි හානි කරගෙන ඇතැයි මූලික පොලිස් පරීක්ෂණවලදී අනාවරණය වී තිබිණි. මියගිය අයගේ සැමියාගේ පියා ත්‍රිකුණාමලය දුම්රිය ස්ථානයේ සේවය කරන අයකු බවද කියයි.

දුම්රිය මාර්ගයට දැමූ යතුරුපැදියේ අයිතිකරු පොලිසිය මඟින් අත්අඩංගුවට ගෙන ඇති අතර දුම්රියට හානි කළ සෙසු පීරිස් සොයා පොලිසිය මෙහෙයුමක් ක්‍රියාත්මක කර තිබේ.
සිද්ධිය සම්බන්ධයෙන් ත්‍රිකුණාමලය මූලස්ථාන පොලිසිය වැඩිදුර විමර්ශන මෙහෙයවයි.
කැප්ෂන්

දුම්රිය එන්ජිමේ ඇති ගල්

මිය ගිය කත දුම්රියේ වැදීමෙන් පසු දුම්රියේ ඇමිණී ගිය ඇයගේ රෙදි කඩක්
දුම්රිය ඉදිරි කණ්ණාඩියට වැදී තිබූ කඩු පහර

අනතුර සිදු වූ ස්ථානයේ දුම්රිය මාර්ගයට පොලිස් ආරක්ෂාව දී ඇති අයුරු
ත්‍රිකුණාමලය දුම්රිය ස්ථානය

අද මව්‍බිමෙන්

තවදුරටත්

මව්බිම දැන්

තවදුරටත්

අද පුවත්පත

අද කාටූනය

mawbima Cartoon