ඡන්දෙන් පස්සේ වෙන ආණ්ඩුවකට රහස් කතා

  👤  4563 readers have read this article !
By mawbima 2018-02-11

ඩබ්ලිව්. කේ. ප්‍රසාද් මංජු

පළාත් පාලන මැතිවරණයෙන් පසුව නව ආණ්ඩුවක් පිහිටුවීම සඳහා කණ්ඩායම් තුනක් විසින් තීරණාත්මක සාකච්ඡා ආරම්භ කර තිබෙන බව අභ්‍යන්තර දේශපාලන ආරංචි මාර්ගවලින් ඉරිදා 'මව්බිම'ට වාර්තා වේ.

පළාත් පාලන මැතිවරණයෙන් කුමන ප්‍රතිඵලයක් ලැබුණද දූෂණයෙන් තොරව නව දේශපාලන වැඩපිළිවෙළක් ක්‍රියාත්මක කිරීම සඳහා භාරකාර ආණ්ඩුවක් පිහිටුවන ලෙස ශ්‍රී ලංකා නිදහස් පක්ෂයේ අමාත්‍යවරුන් පිරිසක් ජනාධිපති මෛත්‍රිපාල සිරිසේන මහතාට දැනටමත් යෝජනා කර තිබෙන බව එම පක්ෂයේ ජේ‍යෂ්ඨ අමාත්‍යවරයෙක් ඉරිදා
'මව්බිම' ට පැවැසීය.

නව ආණ්ඩුවක් පිහිටුවිය හැක්කේ ජනාධිපති මෛත්‍රිපාල සිරිසේන මහතාට බවත් ඒ සඳහා දූෂණයට එරෙහිව එක්සත් ජාතික පක්ෂයේත්, ඒකාබද්ධ විපක්ෂයේත් ජනතා නියෝජිතයන්ට ආරාධනා කරන බවත් එම ප්‍රකාශකයා සඳහන් කෙළේය. එම ආණ්ඩුවේ අග්‍රාමාත්‍යධුරය සඳහා නම් කිහිපයක් යෝජනා වී තිබෙන බවද එම අමාත්‍යවරයා ප්‍රකාශ කෙළේය.

මේ අතර පළාත් පාලන මැතිවරණයෙන් එක්සත් ජාතික පක්ෂය ජයග්‍රහණය කළහොත් එම පක්ෂයේ තනි ආණ්ඩුවක් නිර්මාණය කරන ලෙසට පක්ෂයේ විශාල පිරිසක් මේ වන විට පක්ෂ නායක, අග්‍රාමාත්‍ය රනිල් වික්‍රමසිංහ මහතාට යෝජනා කර තිබෙන බව එම පක්ෂයේ ජේ‍යෂ්ඨ අමාත්‍යවරයකුගෙන් කළ විමසීමකදී ප්‍රකාශ කළේය.
එක්සත් ජාතික පක්ෂය පළාත් පාලන මැතිවරණයෙන් ජයග්‍රහණය කළහොත් එම ජනමතයට ගරු කරමින් එක්සත් ජාතික පක්ෂයේ තනි ආණ්ඩුවක් නිර්මාණය කිරීමට ජනාධිපති මෛත්‍රිපාල සිරිසේන මහතාගේද සහාය ලබාගැනීමට කටයුතු කරන බවද එම අමාත්‍යවරයා සඳහන් කෙළේය.

පළාත් පාලන මැතිවරණයෙන් ශ්‍රී ලංකා පොදුජන පෙරමුණ ජයග්‍රහණය කළහොත් ඒ ජනවරම අනුව අනිවාර්යයෙන්ම හිටපු ජනාධිපති මහින්ද රාජපක්ෂ මහතා අග්‍රාමාත්‍ය ධුරයට පත්කර නව ආණ්ඩුවක් ගොඩනැඟීමට කටයුතු කරන බව ඒකාබද්ධ විපක්ෂයේ ජේ‍යෂ්ඨ නියෝජිතයෙක් ඉරිදා 'මව්බිම'ට පැවැසීය.

හිටපු ජනාධිපති මහින්ද රාජපක්ෂ මහතා අග්‍රාමාත්‍ය ධුරයට පත් කරමින් නව ආණ්ඩුවක් නිර්මාණය කිරීමට ජනාධිපති මෛත්‍රිපාල සිරිසේන මහතාට ජනවරමට ගරු කරමින් තීන්දුවක් ගැනීමට සිදුවන බවද එම නියෝජිතයා පෙන්වා දුන්නේය.
එවැනි අවස්ථාවකදී ශ්‍රී ලංකා නිදහස් පක්ෂයේ අමාත්‍යවරුන් පිරිසකගේ සහායත් තවත් දේශපාලන පක්ෂ කිහිපයකගේම සහායත් ලබාගැනීමට කටයුතු කරන බවද ඒකාබද්ධ විපක්ෂයේ එම ජේ‍යෂ්ඨ නියෝජිතයා ප්‍රකාශ කළේය.

මේ කණ්ඩායම් තුන පාර්ලිමේන්තුවේ සිටින අනෙකුත් කුඩා දේශපාලන පක්ෂවල සහාය ලබාගැනීමටද මේ වන විට සාකච්ඡා ආරම්භ කර තිබෙන බව දේශපාලන අභ්‍යන්තර ආරංචි මාර්ගවලින් වැඩිදුරටත් වාර්තා වේ.

මේ අතර එක්සත් ජාතික පක්ෂයේ ඉහළ නිලයක් දරන ජේ‍යෂ්ඨ ඇමැතිවරයකුගෙන් මේ තත්ත්වය ගැන කළ විමසුමේදී ඔහු කීවේ ඔය කියන කිසිවක් වන්නේ නෑ. කලින් වගේ ජනාධිපතිගේ ප්‍රධානත්වයෙන් 2020 වනතුරු යහපාලන ආණ්ඩුව පවත්වාගෙන යන බවයි.

අද මව්‍බිමෙන්

තවදුරටත්

මව්බිම දැන්

තවදුරටත්

අද පුවත්පත

අද කාටූනය

mawbima Cartoon