උළු වහලෙට උළු දෙඤ්ඤං මයෙ මල්ලියෙ මං එඤ්ඤං

ගම්සභා පැවැති එදා යුගයේ ගමින් ගමට ගම්සභා නියෝජිතවරුන් පත් කර තිබිණි. එදා ජනතාවට වැඩි වශයෙන් ඔවුන් ඇමතුවේ මැම්බර් මහතා යනුවෙනි. මේ මැම්බර් මහත්වරුන් අතර අද දේශපාළුවන් වගේ එදත් කපටි අය සිටියහ. සියනෑ ගම පෙදෙසේ සිටි එක්තරා මැම්බර් කෙනකුගේ වචන හරඹයක කතාවක් මෙසේය.

මේ මැම්බර් ගමන බිමන මෙන්ම කතාවෙන්ද ඉතා කඩිසර ගතියක් පෙන්වන නිසා ගම්වැසියන් මොහුට නැති තැන පැවැසුවේ 'ඉක්මන් මැම්බර්' යනුවෙනි. බෝරු බේගල් දෙසා බැන කපටියකු ලෙසට ප්‍රසිද්ධි වී ඇති මොහු වචන හරඹයටද අති දක්‍ෂයෙකි. කෙසේ හෝ තමන් ජය ලබා ගැනීමටද හපනෙකි.

මැම්බර් පදිංචිව සිටියේ ඉතා පිටිසර ගමකය. මේ ගමට පන්සලක් පවා නොතිබිණි. ගමේ අඩුපාඩු නැති කිරීමට ඔහු උනන්දු වූයේ නැත. මේ අතර ගමේ තරුණ පිරිසක් පන්සලක් තැනීමට ඉදිරිපත් වූහ. ප්‍රථමයෙන් ආවාස ගෙයක් තැනීමට යෝජනා කර ගත් අතර සෑම නිවෙසකින්ම මුදලින් හෝ ද්‍රව්‍යමය වශයෙන් ආධාර එකතු කිරීමට පියවර ගැනිණි. මෙසේ ආධාර එකතු කිරීමට ගිය තරුණ පිරිස මැම්බර්ගේ නිවෙසටද ගියහ. එහිදී ඔවුහු සතුටින් ඉපිල ගියේ මැම්බර් තැන විශාල ආධාරයක් දෙන බවට වූ පොරොන්දුව නිසාය. වහලෙට ඇති තරම් උළු ඔහු තනියෙන් දෙන බව කී නිසා එය ආධාර ලැයිස්තුවටද ඇතුළත් කර ගැනිණි.

ගොඩනැඟිල්ලේ වැඩ ඉක්මනින් සිදු විය. බිත්ති බැඳීම අවසන් කර තිබිණි. වහලයට යටලී දමා රීප්ප ගසා එහි වැඩද නිම කෙරිණි. දැනට අඩුවකට ඇත්තේ උළු පමණි. අද ගෙනෙයි හෙට ගෙනෙයි සිතා බැරිම තැන තරුණ පිරිස උළු ලබා ගැනීමට මැම්බර්ගේ නිවෙසට ගියහ. මෙවෙලේ මැම්බර් තැන ඔවුන් ඉදිරියට පැමිණ 'ඔයගොල්ලෝ උළු ගෙනාවද?' කියා ඇසීය. තරුණ පිරිස අන්දුන්කුන්දුන් වූහ. මෙහිදී එක් තරුණයකු පෙරට පැන 'මැම්බර් මහත්තයානේ උළු දෙනවා කිව්වේ' යනුවෙන් කීවේය. එවිට 'මම කිව්වේ වහලෙට ඇති තරම් උළු තනියෙම දෙනවා කියලා. ඉතින් ඔය ගොල්ලෝ උළු ගෙනත් නැතිව කොහොමද දෙන්නේ' යනුවෙන් මැම්බර් උජාරුවෙන් පැවැසීය. වචන හරඹයේ තරම ඔවුහු වටහා ගත්හ. මේ අතර විසේකාර කොල්ලකු මැම්බර්ගේ ඇඳුම් ගැලවීමට තැත් කළමුත් අනෙක් තරුණයෝ ඊට ඉඩ නොදුන්හ. තරුණ පිරිස මෙවෙලෙහි ඉතා කෝපයෙන් සිටියහ. අපි තමුසෙගේ වයස දිහා බලලා මොකුත් කරන්නේ නෑ. ඔයා මැම්බර් නොවෙයි, නොවැම්බර්. හැබැයි මීට පස්සේ හොට දැම්මොත් මේ විදියට අපි දෙසනවා දෙසැම්බර් වෙනකම්' කියා හූ පූජාවක් තබා මැම්බර්ගේ නිවෙසින් පිටව ගියහ.

විශ්‍රාමික ග්‍රාමනිලධාරි සිරිසේන සිරිගම්පළ