එංගලන්ත සමඟ තරගාවලිය ටිකක් බරට ගන්න වේවි - සංගක්කාර

ඡාත්‍යන්තර ටෙස්ට් ක්‍රිකට් වර්ගීකරණයේ ඉහළම ස්ථානයක පසුවන එංගලන්තය සමඟින් පැවැත්වෙන තරග තුනකින් සමන්විත ටෙස්ට් ක්‍රිකට් තරගාවලිය ශ්‍රී ලංකාවට විශාල අභියෝගයක් වීමට ඉඩ ඇති බව ශ්‍රී ලංකා ක්‍රිකට් කණ්ඩායමේ හිටපු නායකයකු වන කුමාර් සංගක්කාර පවසා තිබේ.

විදෙස් මාධ්‍යයකට අදහස් දක්වමින් සංගක්කාර වැඩිදුරටත් පවසා ඇත්තේ තුන් ඉරියව් ක්‍රීඩකයන් රැසක් සිටින සමබර එංගලන්ත කණ්ඩායම රංගන හේරත් ප්‍රමුඛ ශ්‍රී ලංකා දඟ පන්දු යවන්නන් හමුවේ පාලනය කිරීමට හැකි වුවහොත් එය ශ්‍රී ලංකාවට තීරණාත්මක සාධකයක් වනු ඇති බවය.

"වර්තමාන එංගලන්ත කණ්ඩායමට ලෝකයේ ඕනෑම තණතීරුවක වෙනස් වීමට හැකියාව තියෙන නිසා ඒක අනෙකුත් කණ්ඩායම්වලට ලොකු අභියෝගයක්. ඔවුන්ට හොඳ පිතිකරණ බළඇණියක් තියෙනවා. ඒක අංක 10 දක්වා විහිදී යන නිසාත්, තුන් ඉරියව් ක්‍රීඩකයන් රැසක් කණ්ඩායම තුළ ක්‍රීඩා කරන නිසාත්, ඒ තුළින් ඔවුන්ට අමතර වාසියක් ලැබෙනවා.

ඒක ඔවුන් පසුගිය ඉන්දීය හා පාකිස්තානු තරගාවලිවලදී ඔප්පු කරලා පෙන්නුවා. ශ්‍රී ලංකාව පැත්තෙන් ගත්තොත් ආසියානු ක්‍රිකට් තරගාවලියේදී ලැබූ කටුක බව මඟහරවා ගැනීම සඳහා මේ තරගාවලිය ශ්‍රී ලංකාවට ඉතාමත් වැදගත් තරගාවලියක් වෙනවා වගේම ඔවුන් (ශ්‍රී ලංකාව) රංගන හේරත්ගේ දායකත්වයෙන් තව ජයග්‍රහණයක් ලබාගැනීමට උත්සාහ දරාවි. ඒ ගමන පහසු වීමට නම් පළමු ඉනිමට විශාල ලකුණු ප්‍රමාණයක් ශ්‍රී ලංකා පිතිකරුවන් ලබාගත යුතුයි" යනුවෙන්ද සංගක්කාර සඳහන් කර තිබිණි.