චීනය ඇමෙරිකානු ඉලක්කවලට 'පහරදීමට පුහුණුවක' යෙදෙන බව පෙන්ටගනය සැක කරයි

චීන හමුදා පැසිෆික් කලාපයේ ඇති ඇමෙරිකානු සහ මිත්‍ර පාක්ෂික ඉලක්කවලට "පහරදීම සඳහා විය හැකි පුහුණුවක" යෙදෙන බවට පෙන්ටගනය අනතුරු අඟවයි.

බෝම්බ රැගත් යානා වැඩි දුරකට පියාසර කිරීමේ හැකියාව වර්ධනය කරගැනීමට චීනය කටයුතු කරමින් සිටින බව ඇමෙරිකානු කොංග්‍රසයට සිය වාර්ෂික වාර්තාව ඉදිරිපත් කරමින් පෙන්ටගනය හෙවත් එරට ආරක්ෂක දෙපාර්තමේන්තුව කියා සිටී.

ඩොලර් බිලියන 190 ක ඇස්තමේන්තුගත ආරක්ෂක වියදම් ද ඇතුළුව චීනය තමන්ගේ යුද හැකියාව වර්ධනය කරගනිමින් සිටින බව වාර්තාවෙන් ඉස්මතු කර දක්වයි.

එම වාර්තාව සම්බන්ධයෙන් චීනය මේ දක්වා ප්‍රතිචාර දක්වා නැත.

ගුවන් ප්‍රහාර පිළිබඳ අනතුරු ඇඟවීම, චීනයේ යුද සහ ආර්ථික අභිලාශ පිළිබඳ කළ පුළුල් විග්‍රහයක කොටසක් පමණි.

"පසුගිය වසර තුන පුරා, මහජන විමුක්ති හමුදාව (චීන හමුදාව) සාගරයට ඉහළින් බෝම්බ දැමීමේ හැකියාව වේගයෙන් වර්ධනය කළා. ඒ අනුව, තීරණාත්මක සමුද්‍ර කලාප තුළ අත්දැකීම් වැඩිකර ගනිමින් සහ ඇමෙරිකාවට හා මිත්‍ර ඉලක්කවලට එරෙහිව පහරදිය හැකි පුහුණුවීම්වල යෙදුනා" යැයි වාර්තාවේ සඳහන්වේ.

එසේම, එවැනි ගුවන් ගමන් මගින් ළඟාකර ගැනීමට බලාපොරොත්තුවන අපේක්ෂාව අපැහැදිළි බව එහි වැඩිදුරටත් සඳහන්වේ.

මහජන විමුක්ති හමුදාව සමහර විට " ගුවාම් (Guam) ද බටහිර පැසිෆික් සාගරයේ ඇති ඇමෙරිකානු සහ මිත්‍ර පාක්ෂික හමුදා සහ හමුදා කඳවුරුවලට පහරදීමට ඇති හැකියාව" පෙන්වීමට ඉඩක් පවතින බවත් වාර්තාව පෙන්වාදේ.

"සටන් කිරීමට සහ දිනීමට" චීනය සිය හමුදා ප්‍රතිව්‍යුහගත කරමින් සිටින බව ද ඉන් කියා සිටී.

මීළඟ වසර 10 තුළ චීන යුද වියදම ඩොලර් බිලියන 240 දක්වා වැඩිකිරීමට අපේක්ෂා කරන බව ද කියැවේ.

එසේම එමගින් "අභ්‍යවකාශය හමුදාකරණයට එරෙහි ස්ථාවරයක මහජනයා සිටියද" වැඩිදියුණු කරමින් පවතින චීනයේ අභ්‍යවකාශ වැඩපිළිවෙල ගැන ද වාර්තාවේ සඳහන් වේ.