'යශෝදරා' චිත්‍රපටයේ ආනන්ද හිමි වෙන්න ලැබීම මගේ භාග්‍යයක්

"යශෝදරා" චිත්‍රපටයෙන් ඔබව දකින්න ලැබෙනවා. මේ චිත්‍රපටයට ඔබට සම්බන්ධ වෙන්න ලැබුණේ කොහොමද?

සුනිල් ආරියරත්න මහත්තයාගෙන් තමයි මේ චරිතයට ආරාධනා ලැබෙන්නේ. මම සම්බන්ධ වෙන්නේ ආනන්ද හාමුදුරුවන්ගෙ චරිතයට. මේක මට සුවිශේෂී දෙයක්. මොකද මේ චිත්‍රපටය අති දැවැන්ත චිත්‍රපටයක්. ඇත්තටම ආනන්ද හිමිගේ චරිතය මට ලැබීම ලොකු භාග්‍යයක්.

සුනිල් ආරියරත්න වැනි ප්‍රවීණ අධ්‍යක්ෂවරයෙක් සමඟ වැඩ කරන්න ලැබීම ගැන මොකද හිතෙන්නේ?

ඇත්තටම ඒක ගොඩක් ලොකු සතුටක්.
ඔහුගේ තිබෙන නිහතමානී බව අනෙක් අධ්‍යක්ෂවරුන් ළඟ තියෙනවාද කියන එකත් ලොකු ගැටලුවක්. සුනිල් සර් සිහින් සිරුරක් ඇති මනුස්සයෙක් වුණාට ඔහු ලංකාව තුළ මහ දැවැන්ත චරිතයක්. ඉතින් ඔහුට ගොඩක් ස්තුතිවන්ත වෙන්න ඕන මේ චරිතයට මාව සම්බන්ධ කර ගැනීම ගැන.

ඔබ නිරූපණය කළ චරිතය වෙනුවෙන් ලැබෙන ප්‍රතිචාර ගැන සතුටු වෙන්න පුළුවන්ද?

ගොඩක් හොඳ ප්‍රතිචාර ලැබෙනවා. ඉතින් ඒ ප්‍රතිචාර ලැබෙනකොට මම කරපු දෙය ගැන නිහතමානීව සතුටු වෙනවා.

ඔබ පැවිදි චරිතයක් කළ පළමු අවස්ථාව මෙය නොවෙයි නේද?

මට වැඩිපුර ආරාධනා ලැබෙන්නේ පැවිදි චරිතවලට. දැනට චිත්‍රපට තුනක සහ එක නාට්‍යයක පැවිදි චරිත නිරූපණය කර තිබෙනවා.

ඔබේ රංගන ගමනේ ආරම්භය ගැනත් කතා කරමු.
මම මුලින්ම රංගනයට එන්නෙ කපිල කුමාර කාලිංගගේ වේදිකා නාට්‍යයකින්. ඔහුගෙම "බ්ලැක් බොක්ස් ඇන්ඩ් කූල් තියටර්"හි පර්යේෂණාත්මක රංගනයක් කළා. ඒක ලංකාවේ පළමු වතාවට වතුරක බැහැලා කරපු රංගනයක්. මම ඒකෙත් ප්‍රධාන චරිතයට පණ පෙව්වා. ඒ හරහා ආනන්ද අබේනායකගේ "අප්පච්චි" ටෙලි නාට්‍යයටත් 2011 සිට අද වෙනකම්ම "සංසාරේ පිය සටහන්" පෝය දා නාට්‍යයටත් පැවිදි චරිතයකින් සම්බන්ධ වෙන්න ලැබුණා.

ඔබ වෘත්තියෙන් මනෝ විද්‍යා දේශකවරයෙක්. ඒ අතරතුර රංගන කටයුතුත් දිගටම කරන්නද අදහස?

ඒක දැන්ම කියන්න බැහැ. මම චරිත ඉල්ලගෙන යන කෙනෙක් නෙවෙයි. අනික් එක මම වැඩිපුර වැඩ කරන්නෙ සංජය නිර්මාල් වගේ තෝරාගත් සීමිත පිරිසක් එක්ක. ඊට අමතරව තව ආරාධනා ලැබුණොත් මගේ සීමාවන් තුළ ඒවටත් දායක වෙනවා.

ඔබ ක්ෂේත්‍ර කිහිපයකම ඉන්න කෙනෙක්.
ඒ අතරින් වඩාත් කැමැති කුමකටද?

මම පිටපත් ලියන්න ගොඩක් කැමැතියි.

වෘත්තියෙන් මනෝවිද්‍යා දේශකවරයෙක් වුණු ඔබ ලේඛනයට යොමු වුණේ කොහොමද?

මම පාසල් යන කාලේ ඉඳලම ලේඛන කටයුතු කළා. දවසක් එහෙම ලියපු එකක් ටීචර් කෙනෙක්ට අහු වෙලා ඇය තමයි මට ඉස්සරහට එන්න උදවු කළේ. ඊට පස්සේ කවි, කෙටි කතා ලියන්න පටන් ගත්තා. පස්සේ තමයි වේදිකාවට ආවේ. දැන් ලේඛන කටයුතු කරනවා වගේම රංගන කටයුතුත් කරනවා.

ඔබගේ රංගනයට, ලේඛන හැකියාවට ඇගයීම් ලැබිලත් තිබෙනවා නේද?

ඔව්, 2010දී මධ්‍යම පළාතේ හොඳම නළුවා වුණා. 2009, 2010, 2011 යන අවුරුදු තුනේදීමත් සම්මාන ලැබුණා. මම ලිව්ව "වේදිකාවට දැන් පැමිණෙන දුම්රිය" නාට්‍යයේ පිටපතටත් හොඳම පිටපත ලෙස සම්මාන ලැබුණා. "වේදිකාවට දැන් පැමිණෙන දුම්රිය" නමින් ලිව්ව පොතත් සමඟම මගේ බිරියත්, "බුද්ධා වනේ ක්‍රිෂ්ණා" නමින් පොතක් ලිව්වා. ලංකාවේ ප්‍රථමවරට සැමියා සහ බිරියක් ලියූ කෙටි කතා පොත් දෙකක්, කෙටි කතා ජෝඩුවක් විදියට එළිදැක්වූවා.

අලුත් නිර්මාණවලටත් දායක වුණාද?

සාම ජාතකය පදනම් කරගත් චිත්‍රපටයක නාරද හිමිගෙ චරිතයට පණ පෙව්වා. ස්වර්ණවාහිනියේ විකාශයට නියමිත බුද්ධික සේරසිංහගේ නිර්මාණයකටත් දායක වෙන්න බලාපොරොත්තුවෙන් ඉන්නවා.

තවත් අලුත් වැඩ ගැන සැලසුමක් ඇති?

මමයි මගේ බිරියයි ලියපු "ඒමි" කියන ටෙලි නාට්‍යය ඉදිරියට එන්න තියෙනවා. තව මම ලියපු ටෙලි නාට්‍යයක් සහ චිත්‍රපටයක් නිර්මාණ ලෙස එළියට එන්න තියෙනවා. මම ලියපු නවකතාවක් එන්නත් තියෙනවා. මාත්‍රා කියලා නාට්‍යයක් ලියලා තියෙනවා. ඊට අමතරව චිත්‍රපට තිර රචනා දෙකක් ලියලා තියෙනවා. මේ ඔක්කොම කරන්නේ සංජය නිර්මාල් සමඟ. මම ලියපු ගීතයකුත් ඉදිරියට මගේ රසිකයන්ට අහන්න ලැබෙයි.

ලක්‍ෂිකා දිව්‍යාංජලී වීරකෝන්