නාවික ධජයන්ට සෙත් පැතීමේ පුණ්‍ය මහෝත්සවය ජය ශ්‍රී මහා බෝ සමිඳුන් අභියසදී

  👤  1069 readers have read this article !
Published by : MB WEB 2017-11-21 17:08:45

2017 දෙසැම්බර් මස 09 වන දිනට යෙදී තිබෙන ශ්‍රී ලංකා නාවික හමුදාවේ 67 වන සංවත්සරය නිමිත්තෙන් නාවික ධජයන්ට සෙත් පැතීමේ පුණ්‍ය මහෝත්සවය නාවික හමුදාධිපති, වයිස් අද්මිරාල් සිරිමෙවන් රණසිංහ මහතාගේ ප්‍රධානත්වයෙන් අනුරාධපුර ජය ශ්‍රී මහා බෝ සමිඳුන් අභියසදී ඊයේ (නොවැම්බර් 20) පැවැත්විණි. මෙම අවස්ථාවට නාවික හමුදා සේවා වනිතා ඒකකයේ ගරු සභාපතිනි, සන්ධ්‍යා රණසිංහ මහත්මිය ද සහභාගී වූවාය.

නාවික හමුදාව විසින් අඛණ්ඩව හයවන වරටත් සංවිධානය කළ මෙම ආගමික උත්සවයේදී ජාතික ධජය, බෞද්ධ ධජය, ශ්‍රී ලංකා නාවික හමුදාවේ විධාන, ආයතන සහ නෞකා වලට අයත් ධජයන් 82 කට සෙත් පැතීම එහිදී සිදු කෙරිණි. ජය ශ්‍රී මහා බෝ සමිඳුන්ගේ හා ත්‍රිවිධ රත්නයේ ආශිර්වාද ප්‍රාර්ථනා කිරීම අරමුණු කරගනිමින් පැවති මෙම උත්සවය, අනුරාධපුර අටමස්ථාන ගරුතර මහා සංඝරත්නයේ ප්‍රධානත්වයෙන් පවත්වන ලදී.

මෙම අවස්ථාවට නාවික හමුදා මාණ්ඩලික ප්‍රධානී රියර් අද්මිරාල් නීල් රොසයිරෝ මහතා, උතුරු මැද නාවික විධාන ආඥාපති රියර් අද්මිරාල් මෙරිල් වික්‍රමසිංහ මහතා ඇතුළු නාවික විධානයන් භාර ආඥාපතිවරුන් සහ නාවික හමුදා ‍අධ්‍යක්ෂ ජෙනරාල්වරුන් සහභාගී වී සිටියහ. තවද, නාවික හමුදා මූලස්ථානයට හා උතුරු මැද නාවික විධානයට අනුයුක්ත ජ්‍යෙෂ්ඨ හා කණිෂ්ඨ නිලධාරීන්, නාවිකයින් මෙන්ම බැතිමතුන් විශාල පිරිසක් ද එම අවස්ථාවට එක් විය. ධජ ආශිර්වාද පූජාවට සමගාමීව නාවික හමුදා බෞද්ධ සංගමය මගින් සංවිධානය කරන ලද කප්රුක් පූජා පිංකමක්ද අනුරාධපුර, රුවන්වැලි මහා සෑ රදුන් අභියසදී පැවැත්විණි.

මෙම අවස්ථාවට සමගාමීව, ශ්‍රී මහා බෝධීන්වහස්සේ වන්දනාමාන කිරීම සඳහා පැමිණෙන බැතිමතුන්ගේ පානීය ජල අවශ්‍යතාවය සපුරාලීම සඳහා ස්ථාපනය කරන ලද ප්‍රති ආශ්‍රැත ජල පිරිපහදු යන්ත්‍රය නාවික හමුදාධිපතිතුමන් විසින් ජනතා අයිතියට පත් කරන ලදී. එම අවස්ථාව සඳහා අනුරාධපුර අට‍මස්ථානාධිපති, උතුරු මධ්‍යම දිසාවේ ප්‍රධාන සංඝණායක, ආචාර්ය පූජ්‍ය පල්ලේගම සිරිනිවාසාභිධාන නායක ස්වාමීන්ද්‍රයන්වහන්සේ ඇතුළු ගරුතර මහා සංඝරත්නය ජ්‍යෙෂ්ඨ නාවික නිළධාරීන් සහ බැතිමතුන් ද සහභාගී වී සිටියහ. මෙම ජල පිරිපහදු යන්ත්‍රය සඳහා බුද්ධ ශාසන අමාත්‍යංශය මඟින් මූල්‍යමය දායකත්වය ලබා දී ඇති අතර, ශ්‍රී ලංකා නාවික හමුදාව විසින් පූර්ණ ශ්‍රම දායකත්වය ලබා දී ඇත.

මව්බිම දැන්

තවදුරටත්

අද මව්‍බිමෙන්

තවදුරටත්

අද පුවත්පත

අද කාටූනය

mawbima Cartoon