හිටපු පොලිස් අධිකාරි උඩුගම්පොළට එරෙහිව නීතිපති ගොනු කළ නඩුව ජන:26දා විභාගයට

  👤  1304 readers have read this article !
Published by : MB WEB 2017-11-10 13:12:39

කේ. එස්. උදයකුමාර්

2002 වසරේ අතුරුගිරිය, මිලේනියම් සිටි නිවාස සංකීර්ණය තුළ ඉතා රහසිගතව පවත්වා ගෙන ගිය ශ්‍රී ලංකා යුද හමුදා බුද්ධි අංශයට සම්බන්ධ දිගු දුර විහිදුම් බළකායේ ආරක්ෂක නිවස්නයක් වටලා එහි සාමාජිකයන් අත්අඩංගුවට ගැනීම තුළින් රාජ්‍ය නිල රහස් පනත යටතේ දඬුවම් ලැබිය හැකි වරදක් සිදුකර ඇතැයි චෝදනා කරමින් මහනුවර හිටපු පොලිස් අධිකාරි කුලසිරි උඩුගම්පොළ මහතාට එරෙහිව නීතිපතිවරයා ගොනුකර ඇති නඩුවක් ජනවාරි මස 26දා විභාගයට ගැනීමට කොළඹ මහාධිකරණ විනිසුරු සම්පත් විජේරත්න මහතා ඊයේ (9දා) නියෝග කළේය.

මෙම නඩුවට සම්බන්ධ ඇතැම් සාක්ෂිකරුවන් මියගොස් ඇති නිසාත් තවත් සමහරුන් විදේශ ගතවී ඇති නිසාත් මෙම නඩුව ඉදිරියට පවත්වාගෙන යෑමට හැකියාවක් නොමැති හෙයින් විත්තිකරු නිදහස් කරන්න යැයි ඔහුගේ නීතිඥවරු මීට පෙර නීතිපතිවරයා වෙත ඉල්ලීම් ඉදිරිපත් කර තිබිණි.

එහෙත් මෙම නඩුව ඊයේ කැඳවූ අවස්ථාවේදී නීතිපතිවරයා නියෝජනය කළ රජයේ නීතිඥවරයා සඳහන් කළේ විත්ති පාර්ශ්වය විසින් ඉදිරිපත් කළ ඉල්ලීම නීතිපතිවරයා විසින් සලකා බැලූ බවයි. එහෙත් මෙම නඩුව ඉදිරියටත් විභාග කළ හැකි බවට නීතිපතිවරයා තීරණය කර ඇති නිසා නඩුව විභාගය සඳහා දිනයක් නියම කරන මෙන් රජයේ නීතිඥවරයා අධිකරණයෙන් ඉල්ලීය.

ඉල්ලීම පිළිගත් මහාධිකරණ විනිසුරුවරයා නඩුව ජනවාරි මස 26දා විභාගයට ගැනීමට නියම කළ අතර එදිනට අධිකරණය හමුවේ පෙනී සිටින්නැයි දන්වා සාක්ෂිකරුවන් වෙත සිතාසි නිකුත් කළේය.

2002-01-02දා සහ එම වසරේ සැප්තැම්බර් 3දා දක්වා කාලසීමාව තුළ අතුරුගිරිය මිලේනියම් සිටි නිවාස සංකීර්ණය තුළ ඉතා රහසිගතව පවත්වාගෙන ගිය යුද හමුදා බුද්ධි අංශයට අයත් දිගදුර විහිදුම් බළකායේ ආරක්ෂක නිවස්නයක් වටලා එහි සාමාජිකයන් අත්අඩංගුවට ගැනීම තුළින් රාජ්‍ය නිල රහස් පනත යටතේ දඬුවම් ලැබිය හැකි වරදක් සිදුකර ඇතැයි චෝදනා කරමින් විත්තිකාර සහකාර පොලිස් අධිකාරිවරයාට එරෙහිව නීතිපතිවරයා මෙම නඩුව පවරා ඇත.

මව්බිම දැන්

තවදුරටත්

අද මව්‍බිමෙන්

තවදුරටත්