බංග්ලාදේශය: අගමැතිනි ෂෙක් හසීනා තෙවන වරටත් බලයට පත් වෙයි, "අක්‍රමිකතා" ගැන චෝදනා

  👤  1421 readers have read this article !
Published by : MB WEB 2019-01-01 08:45:18

බංග්ලාදේශයේ අගමැතිනි ෂෙක් හසීනා මහ මැතිවරණයෙන් ජයග්‍රහණය කර තෙවන වරටත් සිය බලය තහවුරු කරගැනීමට සමත් වී ඇති බව එරට මැතිවරණ කොමසාරිස් කාර්යාලය පවසයි.

ඇය නියෝජනය කරන අවාමි ලීග් පාලක පක්ෂය පෙර මැතිවරණවලට වඩා වැඩි ආසන ගණනක් මෙවර හිමිකරගත් අතර, පාර්ලිමේන්තු ආසන තුන්සියයෙන් 288ක් ජයග්‍රහණය කර ඇත.

දරුණු ප්‍රචණ්ඩ ක්‍රියා සහ ඡන්ද නීති කඩකරමින් සිදු වූ මෙම මැතිවරණය "විහිළුවක්" බව විරුද්ධ පක්ෂය පවසයි.

මැතිවරණය නැවත පවත්වන්නැයි ඉල්ලා සිටින විරුද්ධ පක්ෂයට හිමි වූයේ පාර්ලිමේන්තු ආසන හතක් පමණි.

බංග්ලාදේශ පාර්ලිමේන්තුවේ මුළු ආසන ගණන 350ක් වන අතර, එයින් පනහක් කාන්තාවන් වෙනුවෙන් වෙන්කර තිබේ.

"මේ ප්‍රතිඵලය විහිළුවක්, ඡන්දය නැවත පවත්වන්න කියලා අපි මැතිවරණ කොමසාරිස්ට බල කරනවා," යැයි විරුද්ධ පක්ෂයේ නායක කමල් හොසේන් පැවසීය.

"අපක්ෂපාතී ආණ්ඩුවක් යටතේ හැකි ඉක්මනින් නැවත මැතිවරණයක් පවත්වන්න කියලා අපි බල කරනවා."

රට පුරා මැතිවරණ නීති කඩකිරීම් රාශියක් වාර්තා වී ඇති අතර, ඒ පිළිබඳ පරීක්ෂණ පවත්වන බව බංග්ලාදේශ මැතිවරණ කොමසාරිස් රොයිටර් පුවත් සේවයට පැවසුවේය.

මැතිවරණ ප්‍රචාරක කටයුතු සිදුවන කාලය තුළ ආණ්ඩු පක්ෂය සහ විපක්ෂ සාමාජිකයන් අතර සිදු වූ ගැටුම්වලින් 17 දෙනෙකු පමණ මියගොස් ඇති බව වාර්තා වේ.

මව්බිම දැන්

තවදුරටත්

අද මව්‍බිමෙන්

තවදුරටත්

අද පුවත්පත

අද කාටූනය

mawbima Cartoon