ජපානයට ඉහළින් මිසයිල විදීම ගැන උතුරු කොරියාව අනතුරු අඟවයි

  👤  1747 readers have read this article !
Published by : MB WEB 2017-08-30 14:49:13

තවදුරටත් මිසයිල අත්හදා බැලීමට ඇති සැලසුම් පිළිබඳ ඉඟි කරන උතුරු කොරියාව ජපානයට ඉහළින් මිසයිලයක් විදීම ශාන්තිකර කලාපයේ යුද මෙහෙයුම්වල "පළමු පියවර" බව පවසයි.

ඇමරිකා එක්සත් ජනපදයට අයත් ශාන්තිකර සාගරයේ පිහිටි ගුවාම් දූපත සම්බන්ධයෙන් ද උතුරු කොරියාව සිය රාජ්‍යය මාධ්‍ය ඔස්සේ අනතුරු අඟවා තිබේ. 

උතුරු කොරියාව විසින් අඟහරුවාදා (අගෝස්තු 29) විදින ලද මිසයිලය ජපානයේ හොකයිදෝ දූපතට ඉහළින් ඇදී ගොස් මුහුදට පතිත විය.

මිසයිලය පතිත වීමට පෙර, ආරක්ෂක ස්ථානවලට ගොස් ආවරණය සලසා ගන්නා මෙන් ජපාන බලධාරීන් හොකයිදෝ දූපත්වාසීන් වෙත දන්වා තිබිණි. 

එක්සත් ජාතීන්ගේ ආරක්ෂක මණ්ඩලය විසින් උතුරු කොරියාවේ ක්‍රියා පිළිවෙත දැඩි ලෙස හෙළා දකිනු ලැබීය. 

මිසයිල අත්හදා බැලීම නවතා දමන ලෙස අඟහරුවාදා පස්වරුවේ නිව්යෝක් නුවරදී රැස් වුණු එක්සත් ජාතීන්ගේ ආරක්ෂක මණ්ඩලය උතුරු කොරියාවෙන් ඉල්ලා සිටියේය.

උතුරු කොරියාවේ ක්‍රියා පිළිවෙත එක්සත් ජාතීන්ගේ සියලුම සාමාජික රටවලට තර්ජනයක් බව ආරක්ෂක මණ්ඩලය විසින් නිකුත් කරන ලද නිවේදනයක දැක්වේ.

කොරියානු අර්ධද්වීපයේ යුද උණුසුම ඉහළ යාමට ඇමරිකාව විසින් එම කලාපයේ සිදු කරනු ලබන හමුදා ක්‍රියාකාරකම් ද බලපා ඇති බව රුසියාව සහ චීනය පවසති.

උතුරු කොරියාව මත තවදුරටත් පීඩනය යොදවන ලෙස නිල සංචාරයක් සඳහා බදාදා (අගෝස්තු 30) ජපානයට පැමිණි බ්‍රිතාන්‍ය අගමැතිනිය තෙරේසා මේ චීනයෙන් ඉල්ලා සිටියාය.

 (BBC)

 

මව්බිම දැන්

තවදුරටත්

අද මව්‍බිමෙන්

තවදුරටත්