සමහර දේවල් අහිමි වුණේ හොඳට

  👤  3502 readers have read this article !
Published by : MB WEB 2017-07-17 15:20:33

• රුක්‍ෂාණා මේ දවස්වල පුංචි තිරයේ වැඩිපුර පේන්න අරගෙනනේ?

ඔව්. මම සම්බන්ධ වෙන සසර සේයා, මෙඩි සිනා, ලව් යූ බොස්, විමංසා, තුරුම්පු ආසියා කියන ටෙලි නාට්‍ය පහම මේ දවස්වල විකාශය වෙනවා. ඒකයි මාව වැඩිපුර පේනවා වගේ දැනෙනවා ඇත්තේ.

• දැන් මිනිස්සු හිනස්සන වැඩ කරන්නත් පටන් අරගෙන. ඒක රුක්‍ෂාණාගේ සැබෑ වෙනසක් නේද?

මටත් ඒක අලුත්ම අත්දැකීමක් වුණා. 'මෙඩි සිනා' ටෙලි නාට්‍යයත් එක්ක මට වෙනස් විදියට ප්‍රේක්‍ෂකයන් අතරට එන්න අභියෝගයක් ලැබුණා. මම ඒ අභියෝගය භාරගත්තා.

• ඒ වෙනස ප්‍රේක්‍ෂකයෝ ආදරයෙන් වැලඳගෙන කියලා හිතනවාද?

ඔව්. වැලඳගෙන කියලා හිතනවා. මම ඒ වගේ හාසේ‍යාත්පාදක චරිතයක් කරද්දී සමහරු පුදුම වුණා. මගෙන් වෙනසක් දැක්කා කියලා ගොඩක් අය කිව්වා. මට මේ චරිතය ගොඩනඟා ගන්න අධ්‍යක්‍ෂ සුරංජන් විජේනාම මහත්මයත් ගොඩක් උදවු කළා. මේ චරිතය ගොඩක් ප්‍රේක්‍ෂකයන් අතරට ගියා. සමහරු මට කතා කරලා කියනවා එයාලගේ බබාලා පවා මගේ කටහඬ අනුකරණය කරනවා කියලා.

• ඒ වෙනසට විවේචන එල්ල වුණේ නැද්ද?

විවේචනත් තියෙනවා. සමහරු මට කියනවා ඒ වගේ චරිත දිගටම කරන්න එපා කියලා. මට ඕන වුණේ වෙනසක් කරන්න. මමත් එක දෙයකට කොටු වෙන්න කැමැති නැහැ.

• රුක්‍ෂාණා තවම දකින්න ලැබෙන්නේ උප ප්‍රධාන චරිතවලින්. ප්‍රධාන චරිතවල පෙනී හිටින්න රුක්‍ෂාණාට වුවමනාවක් නැද්ද?

මම ටෙලි නාට්‍යවල ප්‍රධාන නිළියක් නෙවෙයි. ටෙලි නාට්‍යවල සීන් එක, දෙක කරලා තමයි මම මේ තැනට ආවේ. මම ක්‍ෂේත්‍රයට ඇවිත් අවුරුදු දෙකක් වෙනවා. මේ ඉන්න තැන ගැන මට සතුටුයි. ප්‍රධාන චරිතයක් කරන්න ආසාවකුත් තියෙනවා.

• රුක්‍ෂාණාට ඒ හීනය දුර ඇයි?

දක්‍ෂතාව, ලස්සන, ආකර්ෂණය, වාසනාව කියන හැමදේම තියෙන්න ඕන ප්‍රධාන නිළියක් වෙන්න. සමහර විට මට මේ හැම දෙයින්ම බාගේ බාගේ ඇත්තේ.

• රංගන ක්‍ෂේත්‍රයේ නිළියෝ වැඩියි නළුවෝ අඩුයි. රුක්‍ෂාණාට තමන්ගේ පැවැත්ම හදාගන්න තරගයක් තියෙනවා කියලා දැනිලා තියෙනවද?

ලංකාවේ නිළියෝ නම් ගොඩක් ඉන්නවා. මොන විදියට ක්‍ෂේත්‍රයට ආවත් අපේ පැවැත්ම තියෙන්නේ අපේ අතේ. අපි රංගනය ගැන අධ්‍යයනය කරලා අප්ඩේට් වුණොත් පැවැත්ම හදාගන්න බැරි වෙන එකක් නෑ.

• රංගනයට එද්දී හිතාගෙන හිටපු ලෝකයද රුක්‍ෂණාට මුණ ගැහිලා තියෙන්නේ?

ඇත්තටම මේකප් ටිකක් දාලා හිටවලා තිබ්බම නිළියක් කියලා තමයි මම ඒ කාලේ හිතාගෙන හිටියේ. හැබැයි රංගනයට ආවම ඒක කොයි තරම් අමාරු දෙයක්ද කියලා තේරුම් ගත්තා.

• රුක්‍ෂණාට ක්‍ෂේත්‍රයේ කැපිලි තියෙනවාද?

නැත්තේමත් නැහැ. හැබැයි මම ඒවා ගනන් ගන්නෙත් නැහැ. මොකද කාට වුණත් කොපි කරන්න පුළුවන්. හැබැයි සම කරන්න බෑනේ.

• රංගනය නිසා රුක්‍ෂණාට හිමිවුණ දේවල්ද අහිමි වුණ දේවල්ද වැඩි?

මට හිමිවුණ දේවල් වැඩියි. මොකද රංගන ශිල්පිනියක් වෙන්න මට හීනයක් තිබ්බා. රංගනයට ආවා කියලා මම අධ්‍යාපන කටයුතු මඟ හැර ගත්තෙත් නැහැ. මම මගේ හීනයටත් ගියා.

• රුක්‍ෂණාට ජීවිතේ අහිමි වුණ දේවල් ඇත්තෙම නැද්ද?

අහිමි වුණ දේවල් තියෙනවා. හැබැයි ඒ දේවල් අහිමි වුණේ හොඳකට කියලා තමයි මම හිතන්නේ.

• සමහරු කියනවා ක්‍ෂේත්‍රයේ ඉන්න නිළියන් දැලේ දාගන්න උත්සාහ කරන අය ක්‍ෂේත්‍රයේ වැහි වැහැලා කියලා. ඇත්තද මේ කතා?

ජනප්‍රියත්වය තියෙන, ලස්සන කෙනෙක් තමන්ගේ කරගන්න සමහරු කැමැති වෙන්න පුළුවන්. නමුත් නිවැරැදි වෙලාවේ තමන්ට අවශ්‍ය නිවැරැදි කෙනා කවුද කියලා තමන් තීරණය කරන්න ඕන.

• රුක්‍ෂාණාට දැන් නිවැරැදි කෙනෙක් ළංවෙලාද ඉන්නේ?

ඔව්. එහෙම කෙනෙක් ඉන්නවා.

• ඒ කෙනා රංගන ක්‍ෂේත්‍රයෙම කෙනෙක්ද?

ඒ ගැන පස්සේ කියමු නේද?

• ඒ නිවැරැදි කෙනා තමන්ගෙම කරගන්නේ කවද්ද?

තව අවුරුදු දෙකකින් විතර එයා මගේ වෙයි කියලා හිතනවා.

තිළිණි කෞශල්‍යා විජේසිංහ

ඡායාරූප - තුෂාර සංජීව

මව්බිම දැන්

තවදුරටත්

අද මව්‍බිමෙන්

තවදුරටත්